Магілёўская вобласць 24 верасня далучыцца да рэспубліканскай акцыі «Моладзь за бяспеку». Праект, прымеркаваны да Дня абвяшчэння Беларускай маладзёжнай грамадскай арганізацыі выратавальнікаў-пажарных, будзе доўжыцца па 12 кастрычніка. Пра гэта карэспандэнту сайта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Акцыя ў рэгіёне прадугледжвае тры этапы: шэфскі, забаўляльна-навучальны і іміджавы.

З 24 верасня па 2 кастрычніка з дабрачынна-шэфскай місіяй ратавальнікі і актывісты БМГАВП адправяцца да тых, хто сапраўды мае патрэбу ў дапамозе: у шматдзетныя сем’і, да ветэранаў Вялікай Айчыннай вайны, адзінокіх пенсіянераў і інвалідаў. Фронт працы значны: устаноўка аўтаматычных пажарных апавяшчальнікаў, нарыхтоўка дроў, уборка тэрыторыі і іншыя работы, якія пад сілу юным выратавальнікам.

З 3 па 10 кастрычніка ў агульнаадукацыйных установах, сацыяльных прытулках, дамах-інтэрнатах правядуць мерапрыемства пад назвай «Дзень нараджэння БМГАВП! Святкуем разам!». У праграме – прэзентацыі арганізацыі і часопіса «Юны ратавальнік», урачыстае ўручэнне членскіх білетаў, выступленні агітбрыгады, конкурсы, творчыя нумары, дэманстрацыя тэматычных відэафільмаў.

11-12 кастрычніка на адкрытых пляцоўках, у месцах масавага знаходжання людзей (цэнтрах дзіцячай творчасці, Палацах моладзі, кінатэатрах, актавых залах, ДК, парках і г.д.) будуць арганізаваны канцэрты, якія ўключаюць творчыя нумары актывістаў БМГАВП, славуты і ўсімі любімы КВЗ , віктарыны, латарэі і інш.

Асаблівая фішка цяперашняй акцыі – «Восеньскі баль юных ратавальнікаў». На свяце, акрамя вальсавання і танцавальна-конкурснай праграмы, будуць і ўрачыстыя моманты: узнагароджанне актывістаў БМГАВП, прадстаўнікоў сферы адукацыі, прысвячэнне юных ратавальнікаў у рады БМГАВП і ўручэнне ім членскіх білетаў.

Летапіс руху юных пажарных вядзецца з 30-х гадоў мінулага стагоддзя, а арганізацыйнае аб’яднанне паміж ужо існуючымі клубамі юных ратавальнікаў-пажарных як грамадскай структуры адбылося 14 кастрычніка 2001 года, калі і была створана Беларуская маладзёжная грамадская арганізацыя выратавальнікаў-пажарных. Магілёўскае абласное аддзяленне БМГАВП было створана 12 лістапада 2002 года. Сёння колькасць арганізацыі ў Магілёўскай вобласці – больш за 24 тыс. юнакоў і дзяўчат.