Магілёўская вобласць і кітайская правінцыя Цзянсу дамовіліся вывесці гандлёва-інвестыцыйнае супрацоўніцтва на новы ўзровень. Пра гэта паведаміў генеральны консул Беларусі ў Шанхаі Валерый Мацэль.

«Нарошчванне і дыверсіфікацыя паставак беларускай прадукцыі на кітайскі рынак, ход рэалізацыі ў Магілёўскай вобласці асобных інвестыцыйных праектаў, рост экспарту беларускіх турыстычных паслуг у КНР былі ў цэнтры ўвагі на сустрэчы губернатара Магілёўскай вобласці Уладзіміра Даманеўскага з губернатарам Усходняй кітайскай правінцыі У Чжэнлунам, – расказаў Валерый Мацэль. – Падчас сустрэчы кіраўнікі пабрацімскіх рэгіёнаў адзначылі паспяховую рэалізацыю праекта па пастаўцы на рынак Кітая ялавічыны Магілёўскага мясакамбіната, інвестыцыйных праектаў па вырошчванні ў Магілёўскай вобласці льновалакна і грыбоў, працу ў Магілёве цэнтра кітайскай традыцыйнай медыцыны».

Па выніках наведвання дэлегацыяй найбуйнейшай у правінцыі кампаніі сеткавага гандлю «Суга Супермаркет», у якую ўваходзяць каля 1,8 тыс. магазінаў, дасягнута дамоўленасць аб пастаўках у Кітай малочнай прадукцыі ААТ «Бабушкина крынка». Плануецца, што першая партыя малака паступіць на прылаўкі магазінаў гандлёвай сеткі кітайскай кампаніі ў лютым наступнага года, напярэдадні свята Вясны – кітайскага Новага года.

Губернатары Магілёўскай вобласці і правінцыі Цзянсу адзначылі важнасць механізму міжрэгіянальнага супрацоўніцтва для нарошчвання двухбаковага эканамічнага ўзаемадзеяння, паставілі задачу зрабіць супрацоўніцтва Магілёўскай вобласці і Цзянсу ўзорам для іншых рэгіёнаў Беларусі і Кітая.

Тэкст – БЕЛТА

Фота Генеральнага консульства Беларусі ў Шанхаі