Магілёўскі аблспажыўсаюз плануе нарыхтаваць у цяперашнім сезоне 200 т журавін, што ў два разы больш, чым у 2017 годзе, паведаміў начальнік аддзела нарыхтовак аблспажыўсаюза Аляксей Сіроцін.

У гэтым годзе дзякуючы спрыяльнаму надвор’ю ў Магілёўскай вобласці атрыманы добры ўраджай журавін. Іх збор і нарыхтоўка пачаліся 1 верасня і актыўна працягваюцца. Асноўнымі ўгоддзямі з’яўляюцца гідралагічныя заказнікі «Выспы Дулебы» (Клічаўскі раён) і «Заазер’е» (Бялыніцкі раён), дзе самыя вялікія па плошчы балотныя масівы ў вобласці.

«На сённяшні дзень мы ўжо нарыхтавалі 80 т гэтага вітамінавага прадукту. Прыёмачны кошт у нашых нарыхтоўвальных пунктах – каля Вr3 за кг. Пры гэтым дасведчаны зборшчык можа нарыхтаваць некалькі дзясяткаў кілаграм», – распавёў Аляксей Сіроцін.

«Часткова ягаду мы плануем рэалізоўваць праз уласную гандлёвую сетку насельніцтву, а каля паловы – экспартаваць у краіны ЕС і Расію. Напрыклад, з нарыхтаваных сёлета 353 т чарніц ужо рэалізавана за межы рэспублікі 260 т», – адзначыў прадстаўнік аблспажыўсаюза.

Паводле яго слоў, практычна па ўсіх пазіцыях, што тычацца хатняй і дзікарослай ягады, у гэтым годзе ідзе павелічэнне нарыхтовак. У цяперашні час таксама актыўна вядзецца збор садавіны (яблыкаў). Калі ў мінулым годзе было нарыхтавана 13 тыс. т яблыкаў, то ў гэтым сезоне ставіцца задача – не менш за 15 тыс. т.

БЕЛТА