Магілёўскі абласны драматычны тэатр падаў заяўку аб уступленні ў асацыяцыю «Шаўковы шлях», паведамілі ва ўстанове культуры.

Глабальная ідэя новага Шаўковага шляху паўстала ў Кітаі, пры падтрымцы іншых краін, у тым ліку Беларусі. Але разам з гандлем, прасоўваннем тавараў з Азіі ў Еўропу гаворка ідзе і пра іншыя сумесныя праекты, у тым ліку ў галіне культуры і мастацтва.

Да гэтага часу ў асацыяцыю «Шаўковы шлях» ўвайшлі два сталічныя тэатры - Нацыянальны акадэмічны тэатр імя Янкі Купалы і Нацыянальны акадэмічны Вялікі тэатр оперы і балета.

«Уступленне ў асацыяцыю дасць магчымасць нашай трупе ўдзельнічаць у яе праграмах, у тым ліку абменьвацца гастролямі, праходзіць навучанне і ўдзельнічаць у майстар-класах. І самае галоўнае - гэта перспектыва гастроляў тэатра ў Кітаі», - адзначылі ў Магілёўскім драматычным тэатры.

У гэтым годзе на сцэне драмтэатра ўпершыню паказалі традыцыйную кітайскую оперу. Магілёў з гастролямі 7 чэрвеня наведала Шэньчжэньская тэатральная трупа кітайскіх опер.

БЕЛТА