Да 10 жніўня можна даслаць працы на конкурс магілёўскага фестывалю аматарскіх кароткаметражных фільмаў «Словы». Пра гэта карэспандэнту сайта паведаміў кіраўнік Цэнтра гарадскіх ініцыятыў Юрый Стукалаў.

Для ўдзелу ў творчым спаборніцтве трэба стварыць з дапамогай любой наяўнай тэхнікі кароткае відэа (да пяці хвілін), загрузіць яго на Youtube, даслаць спасылку і кароткую інфармацыю пра фільм і сябе на адрас cgimogilev@gmail.com.

«У мінулым сезоне ў лік фіналістаў трапілі вельмі розныя па жанрах працы. Сярод іх артхаўсныя кароткаметражкі, анімацыя, дакументальныя сюжэты пра гісторыю горада, свайго роду паэтычны кліп, - адзначыў Юрый Стукалаў. - Пры гэтым усе яны ўдзельнічалі ў конкурсе на роўных, што дадало цяжкасці ў працы членам журы, але ў той жа час было вельмі цікава. Спадзяемся, і ў гэты раз нашы аўтары пацешаць займальнымі сюжэтамі, незвычайнымі хадамі і рашэннямі».

Фінальны прагляд лепшых работ і цырымонію ўзнагароджання іх аўтараў плануецца правесці, як і ў мінулым годзе, у фармаце «кінатэатра пад адкрытым небам». Галоўны пераможца таксама атрымае сучасную экшн-камеру для працягу творчых эксперыментаў.

Даведацца падрабязнасці аб праекце і сачыць за яго ходам можна на сайце slovy.urbanistic.by. Творчыя або тэхнічныя пытанні прымаюцца па адрасе cgimogilev@gmail.com.