Чацвёрты Магілёўскі фестываль навукі збярэ маладых навукоўцаў 21-23 лютага ў Беларуска-Расійскім універсітэце. Пра гэта карэспандэнту сайта паведамілі ў адміністрацыі ўстановы адукацыі.

Па словах суразмоўцаў, форум абяцае стаць значным грамадскім мерапрыемствам у жыцці абласнога цэнтра. Плануецца, што ў Магілёў прыедуць удзельнікі і госці фестывалю з 8 краін: Беларусі, Расіі, Таджыкістана, Узбекістана, Грузіі, Польшчы, Чэхіі і Аргенціны.

На працягу трох дзён свята навукі пройдуць лекцыі-дыспуты, майстар-класы, творчыя сустрэчы, навукова-практычныя семінары, конкурсы прэзентацый школьнікаў «Навука і яе творцы», даследчых работ навучэнцаў «Гульні розуму», інтэлектуальны чэмпіянат «Свая гульня», алімпіяды «GRAPHO» (па начартальнай геаметрыі і чарчэнні), па фінансавай граматнасці, праграмаванні і інш.

Галоўнымі падзеямі фестывалю стануць выстава «Навука ўчора і сёння», дзе будуць прадстаўлены працы сучаснай тэхнікі, конкурс-выстава дзіцячага малюнка «Я малюю навуку», адкрытая Міжнародная алімпіяда БРУ па матэматыцы «MathOpen 2018 Belarus», а таксама Міжнародны фестываль навучальных фільмаў «Физиканские львы».

Заключным мерапрыемствам трэцяга Магілёўскага фестывалю навукі стане падвядзенне вынікаў конкурсаў і ўзнагароджанне пераможцаў.

Форум праводзіцца з мэтай стымулявання цікавасці і прыцягнення да навуковай дзейнасці моладзі, прапаганды сучасных навуковых ведаў, дасягненняў у галіне тэхнікі, інфармацыйных тэхналогій, павышэння іміджу педагагічнай дзейнасці, укаранення інавацыйных метадаў выкладання і абмену вопытам работы з адоранай моладдзю паміж выкладчыкамі сярэдніх і вышэйшых навучальных устаноў.

Заснавальнікамі мерапрыемства з’яўляюцца Магілёўскі гарвыканкам, Беларуска-Расійскі універсітэт, ліцэй БРУ.

Палажэнне