Мемарыяльную дошку ў гонар вядомага вучонага-краязнаўцы Пятра Лярскага ўстановяць у Магілёве 19 студзеня. Пра гэта паведамілі ў МДУ імя А. А. Куляшова.

Ініцыятарам стварэння дошкі Пятра Лярскага стаў Магілёўскі абласны аддзел ГА «Беларускае геаграфічнае таварыства», які ўзначальвае прафесар кафедры прыродазнаўства ўніверсітэта Ігар Шаруха. Ідэю падтрымала гарадская тапанімічная камісія. Пасля адбылося абмеркаванне і ўзгадненне з мясцовым кіраваннем архітэктуры і горадабудаўніцтва. Пазней Магілёўскі гарвыканкам атрымаў дазвольны дакумент на выраб і ўсталяванне мемарыяльнай дошкі ад Міністэрства культуры Беларусі. У зборы сродкаў на рэалізацыю праекта прыняло ўдзел больш за 800 чалавек, у тым ліку члены геаграфічнага таварыства краіны, грамадскіх арганізацый і прадпрыемстваў горада Магілёва, студэнты, яго былыя вучні, родныя і блізкія навукоўца. Аўтарам памятнага знака выступіў мясцовы скульптар Андрэй Вараб’ёў.

Дошку плануюць размясціць на будынку корпуса ўніверсітэта №3 па вул. Першамайскай, дзе калісьці працаваў навукоўца. Урачыстае адкрыццё прызначана на 12.00.

У Магілёве таксама адбудзецца яшчэ некалькі мерапрыемстваў, прысвечаных юбілейнай даце. Сёння ў 15.00 у корпусе №1 МДУ імя А. А. Куляшова (вуліца Касманаўтаў, 1, аўдыторыя 201) адкрылася фотавыстава пад назвай «Геаграфія душы» магілёўскага фатографа Александра Ліціна. 18 студзеня ў 18.00 у актавай зале абласной бібліятэкі імя У. І. Леніна пройдзе вечар памяці Пятра Лярскага.

Суразмоўцы дадалі, што для ўсіх жадаючых у аўдыторыі №19 корпуса №3 універсітэта адкрыты ў свабодным доступе мемарыяльны куток географа. Акрамя таго, з 2 студзеня ва ўсіх аддзяленнях сувязі краіны можна набыць канверт, спецыяльна выдадзены ў гонар 100-годдзя Пятра Лярскага. Карткі накладам 20 тыс. асобнікаў былі надрукаваны на РУП «Бабруйская ўзбуйненая друкарня імя А. Т. Непагодзіна».

Пётр Лярскі нарадзіўся ў вёсцы Рымінка Чавускага раёна, скончыў геаграфічны факультэт педагагічнага інстытута. У гады Вялікай Айчыннай вайны ваяваў у асобым партызанскім палку пад камандаваннем Героя Савецкага Саюза Сяргея Грышына. Пасля вызвалення Беларусі працаваў дырэктарам Асінаўскай сярэдняй школы, а ў канцы 1944 года па запрашэнні перайшоў на геаграфічны факультэт педагагічнага інстытута (цяпер МДУ імя А. А. Куляшова). Займаўся выкладчыцкай і навуковай дзейнасцю. Разам з М. С. Ратабыльскім ў 1958 годзе падрыхтаваў і выдаў падручнік «Геаграфія» для студэнтаў педагагічных факультэтаў, які разышоўся па ўсім Савецкім Саюзе і некалькі разоў перавыдаваўся. Ён таксама аўтар выданняў «Землязнаўства і краязнаўства», «Дапаможнік па краязнаўстве». У 70-я гады ўбачыла свет серыя яго школьных падручнікаў па курсе «Прыродазнаўства». Кнігі перавыдаваліся са зменамі і дапаўненнямі аж да сярэдзіны 90-х гадоў. У 2005 годзе пад яго аўтарствам была выдадзена ўнікальная ў сваім родзе кніга – «Прырода Магілёўскай вобласці».

Пётр Лярскі быў членам таварыства аховы прыроды, геаграфічнага таварыства СССР, Беларускага геаграфічнага таварыства. У 2006 годзе стаў лаўрэатам прэміі Магілёўскага аблвыканкама «Чалавек года». Памёр 25 кастрычніка 2013 года. Пахаваны на Грузаўскіх могілках у Магілёве. 5 верасня 2017 года імя вядомага вучонага-краязнаўцы прысвоена сярэдняй школе №21 абласнога цэнтра.