Міжнародны стартап-фестываль нацыянальнай кухні пройдзе ў Магілёве 29 сакавіка падчас тыдня сучаснага кулінарнага мастацтва ў сферы HoReCa ў дзяржаўным універсітэце харчавання. Пра гэта паведаміла прарэктар па выхаваўчай рабоце ўстановы адукацыі Вольга Мацікава.

Заяўкі на ўдзел у ім ужо падалі каманды з Літвы, Польшчы, Балгарыі, Расіі. Вялікую цікавасць фестываль выклікаў і ў студэнтаў Украіны. Напрыклад, Адэская нацыянальная акадэмія харчовых тэхналогій ужо падала тры заяўкі на ўдзел, а Кіеўскі нацыянальны ўніверсітэт імя Тараса Шаўчэнкі – дзве.

«Мы чакаем, што студэнты прадставяць на ім крэатыўныя ідэі і праекты, у тым ліку гатовыя да рэалізацыі ў некалькіх кірунках: «Кулінарны брэнд», «Паслуга», «Тэхналогія вытворчасці», «Аб’ект грамадскага харчавання». У ходзе мерапрыемства мы выберам найлепшыя ідэі, якія, я спадзяюся, будуць увасоблены ў жыццё. Гэта значыць, у нас з’явяцца арыгінальныя рэцэптуры, тэхналогіі і аб’екты харчавання», – адзначыла Вольга Мацікава.

У якасці членаў журы на фестывалі будуць працаваць сапраўдныя прафесіяналы сваёй справы. Гэта кіраўнік гільдыі шэф-повараў Беларусі Аляксандр Чыкілеўскі, аўтарка інтэрнэт-праекта «Смачны Блог» Таццяна Назарук, намеснік галоўнага эксперта Беларусі WorldSkillsBelarus па кампетэнцыі «Кулінарнае мастацтва» Павел Макаўка і інш.

Падчас тыдня сучаснага кулінарнага мастацтва ў сферы HoReCa з 28 па 30 сакавіка пройдуць кулінарны конкурс прафесійнага майстэрства, моладзевы міжнародны конкурс прафмайстэрства па правілах WorldSkills па кампетэнцыі «Кулінарнае мастацтва». Моладзь чакаюць лекцыі, семінары, майстар-класы, тэматычныя экскурсіі і забаўляльная праграма.

БЕЛТА