Дзень беларускіх студэнцкіх атрадаў адзначаецца 1 жніўня. Мерапрыемствы, прымеркаваныя да свята, праводзяцца ва ўсіх раёнах Магілёўскай вобласці, паведамілі ў абласным камітэце БРСМ.

Хлопцы і дзяўчаты ўдзельнічаюць у тэматычных адкрытых дыялогах, спартыўных турнірах, інтэлектуальных гульнях і інш.

Сёлета ў Магілёве байцоў, камандзіраў і камісараў гарадскіх атрадаў у гонар свята запрасілі на пікнік. На пляцоўцы за Палацам культуры вобласці яны пазмагаліся за перамогу ў турніры па міні-гольфе, пагулялі ў «Кракадзіла» і «Твістэр», прайшлі спецыяльны трэнінг.

У Чавусах адбыўся велапрабег па месцах баявой славы. Яго ўдзельнікі ўсклалі кветкі да мемарыяла ў гарадскім парку, брацкага пахавання савецкіх воінаў ля будынка РАУС, памятных знакаў Герою

Савецкага Саюза Сямёну Азараву, «Танк», воінам 160-й Горкаўскай стралковай дывізіі.

Для моладзі Глуска і Бялыніч правялі спартландыі, а круглянскія хлопцы спаборнічалі ў міні-футболе.

Працоўны семестр ў рэгіёне працягваецца. Магілёўскім абласным штабам студэнцкіх атрадаў сфарміравана 127 атрадаў агульнай колькасцю 1525 чалавек. Запатрабаваны атрады ўсіх профіляў: будаўнічыя, сэрвісныя, экалагічныя, сельскагаспадарчыя, педагагічныя і медыцынскія.