У Круглым стартавала акцыя «Музей у кожны двор». Пра гэта паведаміла дырэктар Круглянскага раённага гісторыка-краязнаўчага музея Віія Гапаева.

«Мы стварылі некалькі тэматычных экспазіцый, кожная з якіх лёгка ўмяшчаецца ў адзін вялікі чамадан. З выставамі падарожнічаем па дварах райцэнтра, каб наведаць юных жыхароў горада, правесці для іх на канікулах займальныя экскурсіі. Да гэтага часу ў нас была этнаграфічная тэматыка. Прыязджаючы ў чарговы гарадскі дворык, мы расказвалі аб гісторыі Круглянскага краю, мясцовых традыцыях, знаёмілі са старадаўнімі прадметамі побыту. У наш чамаданчык («Музей у чамадане») мясціліся невялікі старадаўні прас, ручнік, лапці: інфармацыю мы пацвярджалі наглядна», –заўважыла дырэктар музея.

Да свята горада і Дня Незалежнасці Беларусі падрыхтавана новая тэматычная экспазіцыя. «Мы раскажам дзецям аб знакамітых людзях Кругляншчыны, якіясваёй доблесцю, адвагай і мужнасцю адстаялі нашу незалежнасць, свабоду і мірнае неба над галавой, –падкрэсліла суразмоўца. – Напрыклад, наш зямляк, Герой Савецкага Саюза Сцяпан Аляксандравіч Лавянецкі асабліва вызначыўся ў 1944 годзе ў баях за венгерскі населены пункт Надзьбаём. Умела манеўруючы самаходнай артылерыйскай устаноўкай, сяржант Лавянецкі дапамог экіпажу падбіць тры варожыя танкі і рассеяць батальён пяхоты. Адважны механік-кіроўца самаходкі быў цяжка паранены, але працягваў змагацца з ворагам. Загінуў смерцю храбрых у падпаленай фашыстамі баявой машыне, пахаваны ў Венгрыі на месцы апошняга бою».

У чамадане-музеі дзецям прывязуць фота часоў Вялікай Айчыннай вайны, лісты з фронту, асабістыя рэчы герояў і нават макеты зброі тых гадоў. З новай экспазіцыяй і тэматычнай экскурсіяй хлопцаў і дзяўчат пазнаёмяць ужо 21 чэрвеня ў двары па вуліцы Савецкай, 86 (15.00). Аб тым, што ў двор прыедзе музей, даюць анонсы ў сацсетках, мясцовых СМІ, размяшчаюць друкаваныя аб’явы.

Ідэя наведаць юных жыхароў Круглага падчас летніх канікул работнікам музея прыйшла яшчэ год таму. «Тады мы зрабілі некалькі выездаў. Новы фармат экскурсій спадабаўся дзецям, і мы вырашылі гэта рабіць на пастаяннай аснове. Каб забавы на свежым паветры неслі не толькі аздараўленчы характар, але і пазнавальны, музей цяпер сам прыходзіць у двор да дзятвы», – адзначыла Віія Гапаева.

Толькі за лета супрацоўнікі музея плануюць наведаць 8 двароў у жылых мікразонах Круглага.

БЕЛТА