У Магілёўскай вобласці за выхадныя адбылося сем пажараў, адзін з іх скончыўся гібеллю мужчыны. Пра гэта карэспандэнту сайта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю абласнога ўпраўлення МНС Вольга Нехарошых.

14 кастрычніка каля паўночы ратавальнікі выязджалі на ліквідацыю ўзгарання жылога дома ў пасёлку Ялізава Асіповіцкага раёна. Мясцовыя жыхары заўважылі гарэнне, калі дом ужо палаў. Пад абваленымі канструкцыямі на падлозе аднаго з пакояў выратавальнікі знайшлі труп мужчыны, як мяркуецца, 39-гадовага гаспадара. Агонь знішчыў дах, перакрыцце і маёмасць у доме. Прычына здарэння ўстанаўліваецца.

13 кастрычніка каля 7 гадзін раніцы паступіла паведамленне аб пажары ў магазіне «Ветразь”, размешчаным па вуліцы Савецкай у Крычаве. У выніку ўзгарання халадзільнай вітрыны ўся гандлёвая залабыла задымлена. Магазін яшчэ не працаваў, таму людзей у ім не было. У лічаныя хвіліны полымя было ўтаймавана. Меркавана пажар адбыўся па прычыне кароткага замыкання праводкі халадзільнай вітрыны.