На шклозаводзе «Ялізава» плануецца мадэрнізацыя вытворчасці. Пра гэта ішла размова падчас візіту на прадпрыемства намесніка прэм’ер-міністра Анатоля Калініна, паведамілі ў прэс-службе беларускага ўрада.

Віцэ-прэм’ер 13 чэрвеня ажыццявіў рабочую паездку ў Магілёўскую вобласць. Анатоль Калінін сустрэўся з працоўным калектывам філіяла «Ялізава», ААТ «Гродзенскі шклозавод» падчас правядзення адзінага дня інфармавання на тэму «Прыродныя рэсурсы і іх рацыянальнае выкарыстанне ў Рэспубліцы Беларусь». У мерапрыемстве таксама прынялі ўдзел міністр архітэктуры і будаўніцтва Анатоль Чорны і старшыня Асіповіцкага райвыканкама Павел Налівайка.

«Анатолю Калініну далажылі аб выніках работы прадпрыемства. Ён адзначыў, што пасля далучэння да Гродзенскага шклозавода калектыў прадпрыемства працягвае працаваць стабільна і эфектыўна. Разгледжана пытанне аб правядзенні мадэрнізацыі вытворчасці. У найбліжэйшы час будзе праведзены рамонт дзвюх шклаварных печаў, што дазволіць павысіць якасць прадукцыі», – адзначылі ў прэс-службе.

Намеснік прэм’ер-міністра таксама наведаў ЗАТ «Асіповіцкі завод транспартнага машынабудавання», дзе азнаёміўся з рэалізацыяй бізнес-плана па развіцці вытворчасці і даў даручэнні. У прыватнасці, ён даручыў азнаёміцца з вопытам работы ЗАТ «Штадлер Мінск» па вытворчасці сучаснага рухомага саставу.

У адпаведнасці з вытворчым планам на 2018 год на заводзе ў Асіповічах павінны вырабіць 915 танк-кантэйнераў і 1 085 грузавых вагонаў. Гэта дазволіць задаволіць унутраны попыт і замацаваць пазіцыі беларускіх вагонабудаўнікоў на знешнім рынку.

БЕЛТА