У мінулым годзе аднаму з нашых прамысловых гігантаў – ААТ «Белшына» – удалося не толькі ўтрымаць старыя рынкі, але і заваяваць новыя.

Статыстыка росту

Прыемна чытаць статыстыку, калі яна радуе. «Белшына» за апошнія 12 месяцаў вырабіла больш за 3,7 млн шын і іншай прадукцыі на агульную суму Br712 млн. Практычна ўвесь тавар быў адгружаны, а выручка ад рэалізацыі склала каля Br800 млн, або прыкладна $ 400 млн. Больш за палову гэтай сумы складае экспарт ($ 228 млн.), што вышэй за аб’ёмы 2016 года.

На ўнутраны рынак, які займае 43% ад агульнага аб’ёму продажаў, адгрузілі 770 тыс. шын і іншай прадукцыі на Br350 млн. Дарэчы, спажыванне ўнутры краіны таксама расце. Генеральны дырэктар ААТ «Белшына» Аляксей Якаўлеў, агучваючы гэтыя лічбы, падкрэсліў, што гэта вынік паляпшэння якасці шын.

«У кожнага вытворцы ёсць свой круг спажыўцоў: хтосьці аддае перавагу толькі імпартнай прадукцыі, хтосьці – шынам беларускай вытворчасці. Важна адзначыць, што з кожным годам попыт на нашы шыны ўзрастае. Пра гэта сведчыць рост продажаў, а таксама вынікі апытванняў насельніцтва. Цяпер нашы шыны па сваіх асноўных тэхнічных характарыстыках не саступаюць замежным аналагам, а з улікам найлепшых суадносін кошту і якасці становяцца яшчэ больш прывабнымі для спажыўца. Выключэнне складаюць толькі шыны, якія адсутнічаюць у вытворчай лінейцы прадпрыемства», – падкрэсліў Аляксей Якаўлеў.

Аднак на «Белшыне» не скрываюць, што ўжо распрацаваны і знаходзяцца на стадыі асваення вытворчасці новыя віды прадукцыі. Якія – пакуль сакрэт.

Цэнавы фактар

Зараз усе вытворчыя плошчы прадпрыемства сканцэнтраваны на тэрыторыі нашай краіны. Але ўжо прапрацоўваюцца варыянты арганізацыі вытворчасці шын у замежных краінах. Бо прадукцыя экспартуецца амаль у 70 краін свету, у тым ліку і далёкага замежжа, напрыклад, у ПАР, Сінгапур, Кубу і ў іншыя. А ў мінулым годзе «Белшына» асвоіла тры новыя рынкі – Кувейт, Камерун і Аман. Але пакуль прадпрыемства думае пра новыя вытворчасці, ёсць магчымасць перагледзець цэны на прадукцыю. Справа ў тым, што ў лістападзе ў Сінгапуры кіраўніцтва завода дамовілася аб пастаўках натуральнага каўчуку:

– Мы гаворым пра якасць як пра бясспрэчную канстанту. Сёння мы атрымліваем сыравіну ў строгай адпаведнасці з тэхнічнымі спецыфікацыямі, распрацаванымі на заводзе. Кантракты, падпісаныя ў лістападзе, у будучыні дазволяць забяспечыць пастаўкі натуральнага каўчуку напрамую ад вытворцаў, абмінаючы іншыя гандлёвыя кампаніі. А гэта, у сваю чаргу, дазволіць скарэктаваць сабекошт выпускаемай прадукцыі.

Фінансавы рэжым

Самым актуальным праблемным пытаннем для «Белшыны» застаецца востры недахоп уласных абаротных сродкаў, неабходных для забеспячэння рытмічнай працы прадпрыемства і заканчэння рэалізацыі інвестыцыйнага праекта. Акрамя таго, адсутнічае закладное забеспячэнне для далейшага крэдытавання ў банках. Прадпрыемства, па словах генеральнага дырэктара, спрабуе выкарыстаць розныя крыніцы фінансавання для папаўнення дадзенага дэфіцыту.

Добрай дапамогай можа стаць падтрымка Сусветнага банка. У сярэдзіне мінулага года «Белшына» вяла перагаворы з нагоды выдзялення сродкаў на працяг мадэрнізацыі. Цяпер ідзе абмен інфармацыяй і дакументамі для далейшых перагавораў.

А тым часам патрэба ў фінансаванні будзе расці. Адкрыццё ў мінулым годзе завода «БелДжы» стала для «Белшыны» знакавай падзеяй, якая абяцае рост вытворчасці.

СБ