Другога красавіка – Дзень яднання народаў Беларусі і Расіі. У гэты дзень у 1996 годзе прэзідэнты дзвюх дзяржаў падпісалі Дагавор «Аб стварэнні Супольнасці Расіі і Беларусі». Праз год, 2 красавіка 1997 года, быў падпісаны Дагавор «Аб саюзе Беларусі і Расіі». Гэтыя два гістарычныя дакументы паклалі пачатак аднаму з найбольш дзейсных інтэграцыйных працэсаў на прасторы СНД.

Гістарычную для двух народаў дату шырока адзначаць у Магілёўскай вобласці, паведамілі карэспандэнту сайта ў галоўным упраўленні ідэалагічнай работы, культуры і па справах моладзі. Гутаркі, лекцыі, выступленні па пытаннях інтэграцыі Беларусі і Расіі пройдуць у працоўных калектывах горада, навучальных установах. У бібліятэках, клубах, інтэрнатах будуць арганізаваны тэматычныя канцэрты, выставы, сустрэчы з ветэранамі вайны і працы, тымі, хто абараняў у гады вайны і адбудоўваў адзіную дзяржаву – Савецкі Саюз.

Галоўнае мерапрыемства адбудзецца 2 красавіка ў 15.00 у канцэртнай зале «Магілёў». Тут пройдзе ўрачыстае мерапрыемства, прысвечанае 22-й гадавіне Дня яднання народаў Беларусі і Расіі. У ім прыме ўдзел кіраўніцтва вобласці і горада, прадстаўнікі грамадскасці, артысты з расійскага Бранска.