Найлепшых работніц аграпрамысловага комплексу Магілёўскай вобласці ўшаноўвалі сёння ў экатуркомплексе «Мікалаеўскія пруды» Круглянскага раёна. Мерапрыемства прымеркавалі да Дня работнікаў сельскай гаспадаркі і перапрацоўчай прамысловасці.

У Круглянскі раён прыехала 40 жанчын самых розных прафесій – ад бухгалтараў, брыгадзіраў, жывёлаводаў да аператараў машыннага даення. На ўрачыстай цырымоніі ім уручылі граматы, кветкі і падарункі ад Магілёўскага аблвыканкама, аблсавета, Беларускага саюза жанчын і Магілёўскага абласнога аб’яднання прафсаюзаў.

«Гэта вельмі важнае мерапрыемства, і я спадзяюся, што ў ім з кожным годам будзе прымаць удзел усё больш жанчын, – сказала сябра прэзідыума Беларускага саюза жанчын, Старшыня Цэнтральнай камісіі Беларусі па выбарах і правядзенні рэспубліканскіх рэферэндумаў Лідзія Ярмошына. – Бо ў аграрным сектары працуе нямала дастойных таго, каб іх адзначылі дзяржава і грамадства на высокім узроўні. Таму я думаю, што такія мерапрыемствы павінны развівацца, набываць большы маштаб, а Магілёўская вобласць павінна стаць прыкладам для іншых рэгіёнаў».

Паводле слоў старшыні Першаснай арганізацыі Беларускага саюза жанчын Палаты прадстаўнікоў Нацыянальнага сходу Вольгі Петрашовай, такога фармату мерапрыемства ў вобласці праводзіцца ўпершыню. «Калі раней мы ўшаноўвалі жанчын у межах абласнога свята «Дажынкі», то ў гэтым годзе межы былі пашыраны. Мы гэта зрабілі, каб нашы жанчыны змаглі бліжэй пазнаёміцца, пагутарыць і абмяняцца вопытам, а таксама адпачыць, аздаравіцца і атрымаць зарад станоўчых эмоцый і ўражанняў, якія былі б стымулам для новых працоўных і творчых дасягненняў», – адзначыла яна.

Удзельніцы мерапрыемства азнаёміліся з развіццём сацыяльнай сферы і славутасцямі Круглага. Яны наведалі гандлёва-забаўляльны комплекс Круглянскай ПМК-266, а таксама вывучылі турыстычную інфраструктуру экатуркомплексу «Мікалаеўскія сажалкі». Фіналам урачыстасці стала святочная праграма«Ад сэрца да сэрца».

БЕЛТА

Фотаздымкі - ўл.