Выхаванцы Магілёўскага абласнога цэнтра алімпійскага рэзерву па конным спорце і сучасным пяцібор’і Ілья Палазкоў і Таццяна Халдоба занялі першыя месцы на адкрытым чэмпіянаце Рэспублікі Беларусь па сучасным пяцібор’і, які праходзіў у Мінску 9-11 чэрвеня. Пра гэта паведамілі ў вучэбна-спартыўнай установе.

Ілья Палазкоў у выніковым пратаколе ўсяго на 3 ачкі апярэдзіў Аляксандра Васіленку і на 7 – Кірыла Касьяніка.

Перавага Таццяны Халдобы была больш пераканаўчай. Ад сярэбранай медалісткі Анастасіі Пракапенка яе аддзяліла 31 ачко, ад трэцяй Кацярыны Арол – 56.

Адкрыты чэмпіянат Беларусі па сучасным пяцібор’і з’яўляўся важным падрыхтоўчым этапам да чэмпіянату Еўропы, які пройдзе ў сталіцы 16-24 ліпеня бягучага года.