Рэспубліканскія спаборніцтвы «Зоркі беларускай акрабатыкі» пройдуць 24-26 верасня ў магілёўскім Палацы гімнастыкі. Пра гэта карэспандэнту сайта паведамілі ў спецыялізаванай дзіцяча-юнацкай школе алімпійскага рэзерву «Багіма» імя А. Р. Мішчанка.

За званне найлепшых будуць змагацца каля 50 удзельнікаў ва ўзросце ад 12 гадоў і больш з Баранавічаў, Брэста, Гомеля, Наваполацка, Мазыра, Мінска, Вілейкі, а таксама гаспадары пляцоўкі. Выступяць акрабаты ў пяці відах: жаночыя і мужчынскія парныя практыкаванні, жаночыя «тройкі», мужчынскія «чацвёркі» і змешаныя пары.

«Спаборніцтвы традыцыйна праходзяць на дастойным узроўні. Упэўненыя, гэты год не стане выключэннем, – падкрэслілі суразмоўцы. – Высокі статус першынства пацвярджае і той факт, што сюды з’язджаюцца наймацнейшыя юныя акрабаты краіны. Акрамя таго, турнір нярэдка становіцца адборачным для ўдзелу ў Чэмпіянаце Еўропы».