За мінулыя суткі ў Магілёўскай вобласці адбылося тры пажары. Адзін з іх ледзь не скончыўся гібеллю мужчыны, паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю абласнога ўпраўлення МНС Вольга Нехарошых.

Паводле слоў суразмоўніцы, вечары і ночы для 79-гадовай бабруйчанкі, якая пражывае ў аднапакаёвай кватэры пяціпавярховага жылога дома па вуліцы Крылова, ужо даўно перасталі быць спакойнымі. І ўсё праз згубную звычку курэння ў ложку яе 51-гадовага сына. У 2013 годзе непатушаная цыгарэта прывяла да пажару, які знішчыў усю маёмасць у пакоі. З таго часу кожны вечар жанчына старанна сачыла за тым, каб сын заснуў без дымлівай цыгарэты ў руках. Вечар 20 лістапада не стаў выключэннем. Каля 23.00 пенсіянерка адчула пах гару і, выявіўшы гарэнне пасцельных прыналежнасцяў, на якіх спаў сын, неадкладна прытушыла полымя. На шчасце, побач з ложкам напагатове стаяла вядро з вадой. З апёкамі 47% цела гора-курэц быў шпіталізаваны. Ачаг узгарання – канапа, якая папярэдне паказвае, што ў здарэнні вінавата злашчасная цыгарэта.