Па прычыне пажару ў Бабруйску з інтэрната эвакуявалі 9 чалавек. Пра гэта карэспандэнту сайта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Паводле папярэдніх дадзеных, узгаранне ў двухпакаёвым блоку, размешчаным на першым паверсе дзевяціпавярховага інтэрната па бульвары Маладзёжным у Бабруйску, справакавана кароткім замыканнем. Пажар адбыўся 15 чэрвеня каля 15.00. Бацькі былі на працы, а ў блоку знаходзілася іх дачка-васьмікласніца разам з сабакам. Менавіта хатні гадаванец першым адчуў пах дыму і гучным брэхам абвясціў дзяўчынку аб бядзе. Яна выбегла на калідор і паклікала на дапамогу.

Пакуль суседзі патэлефанавалі па нумары 101, ратавальнікі ўжо імчаліся на месца пажару, паколькі спрацавала сістэма перадачы паведамлення аб НЗ «Маланка». Па прычыне моцнага задымлення з другога паверха па лесвічнай клетцы было эвакуявана 9 чалавек, з іх 2 дзяцей.

У выніку пажару знішчаны халадзільнік, пашкоджана і закурана маёмасць у памяшканні.

У цэлым за выхадныя дні ў Магілёўскай вобласці адбылося чатыры пажары. Ратавальнікі 19 разоў выязджалі на аказанне тэхнічнай дапамогі. На шчасце, ніхто не пацярпеў.