Рэспубліканскі конкурс-пленэр майстроў разьбы па дрэве «Пераўвасабленне дрэва» ўпершыню пройдзе з 22 па 29 чэрвеня на базе ААТ «ФанДАК» у Бабруйску. Пра гэта паведамілі ў прэс-службе канцэрна «Беллеспаперапрам».

«Конкурс праводзіцца з мэтай развіцця традыцый, павышэння значнасці і прэстыжнасці прафесіі разьбяроў па дрэве, падтрымкі іх творчай актыўнасці, прыцягнення ўвагі да галіны, выяўлення і падтрымкі таленавітых майстроў, развіцця экалагічнага турызму і актыўнага ладу жыцця. Арганізатары конкурсу разлічваюць выявіць яркіх, самабытных майстроў мастацкай разьбы па дрэве, каб падтрымаць іх і дапамагчы ў развіцці», – адзначылі ў прэс-службе.

Да ўдзелу ў конкурсе запрашаюцца пастаянныя работнікі арганізацый канцэрна «Беллеспаперапрам» і лясной гаспадаркі, вучні і студэнты творчых спецыяльнасцяў. Могуць быць дапушчаныя і майстры разьбы па дрэве, якія працуюць самастойна альбо ў арганізацыях іншых галін. Заяўкі на ўдзел прымаюцца да 6 чэрвеня.

Вызначаны намінацыі конкурсу: «Садова-паркавая скульптура і (або) лаўка», «Хуткасная скульптура (і (або) лаўка) бензапілой», а таксама «Майстар «Залатыя рукі»». Працы будуць ацэньвацца па шэрагу крытэрыяў: складанасць і завершанасць працы, арыгінальнасць ідэі, мастацкі ўзровень твора.

Арганізатарамі конкурсу выступаюць Беларускі прафсаюз работнікаў лесу і прыродакарыстання, канцэрн «Беллеспаперапрам» і ААТ «ФанДАК».

БЕЛТА