Першыя малагабарытныя трактары BELARUS 321 вытворчасці ААТ "Бабруйскі завод трактарных дэталей і агрэгатаў" адгружаны ў лістападзе ў Калумбію, паведамілі на прадпрыемстве.

У адпаведнасці з кантрактам з калумбійскай кампаніяй MTZ INGENIERIA SAS у Паўднёвую Амерыку адправіліся два трактары BELARUS 321. Яны выбраны партнёрамі як найбольш прыдатныя для патрэб фермерскіх гаспадарак, якія пераважаюць у структуры сельгаставаравытворцаў Калумбіі.

Трактар BELARUS 321 аснашчаны італьянскім трохцыліндравым рухавіком Lombardini, адметнымі асаблівасцямі якога з'яўляюцца: нізкі ўзровень шкодных рэчываў у выхлапных газах і высокая прадукцыйнасць пры невялікіх эксплуатацыйных расходах. Ён з'яўляецца мадыфікацыяй трактара BELARUS 320.4 і выкананы па колавай формуле 4х4, без кабіны, з пластыкавым тэнт-каркасам для аховы ад сонечных прамянёў і непагоды.

Кампактныя памеры трактара і малы радыус развароту ў спалучэнні з даволі экалагічным рухавіком робяць яго незаменным пры рабоце ў цяпліцах, гадавальніках, садах, а таксама ўнутры падсобных і іншых памяшканняў.

Заключэнне кантракта з кампаніяй MTZ INGENIERIA SAS стала вынікам актыўнай перагаворнай работы спецыялістаў таварыства з калумбійскім партнёрам, які з'яўляецца дылерам галаўнога прадпрыемства "МТЗ-Холдынга" - ААТ "Мінскі трактарны завод", якія і раней займаліся рэалізацыяй трактароў "Беларус", але іншых мадэлей, у асноўным больш магутных.

Гісторыя Бабруйскага завода трактарных дэталей і агрэгатаў вядзецца з 1945 года. Сёння прадпрыемства ўваходзіць у склад "МТЗ-Холдынга". Вытворчасць малагабарытнай трактарнай тэхнікі тут пачалася з 2007 года па ліцэнзіі ААТ "Мінскі трактарны завод".

БЕЛТА