Пляцоўку здароўя адкрылі ў Клічаве на базе мясцовага цэнтра дадатковай адукацыі дзяцей і моладзі. Аб’ект з’явіўся ў рамках праекта міжнароднай тэхнічнай дапамогі “Садзейнічанне развіццю на мясцовым узроўні ў Рэспубліцы Беларусь”, які фінансуецца Еўрапейскім Саюзам (выдзеліў для рэалізацыі ініцыятывы 20,2 тыс. еўра) і рэалізуецца Праграмай развіцця ААН.

Зімой тут плануюць заліваць каток, а ў іншыя поры года пляцоўка будзе зручным і бяспечным месцам для катання на ролікавых каньках, скейтбордах, гіраскутарах і роварах. Акрамя таго, добрае месцазнаходжанне, гатовая інфраструктура, магчымасці для падключэння музыкі, гукаўзмацняльнай апаратуры, наяўныя ў крокавай даступнасці гасцініца і крамы, прадастаўляюць выдатную магчымасць для арганізацыі і правядзення спартыўных спаборніцтваў рознага ўзроўню і іншых мерапрыемстваў. Наведваць аб’ект змогуць усе жыхары Клічава і Клічаўскага раёна: як дарослыя, так і дзеці.

Дарэчы, у канцы верасня – пачатку кастрычніка з мэтай прыцягнення да актыўнага ладу жыцця і заняткаў фізкультурай і спортам большай колькасці жыхароў горада і раёна на базе Клічаўскага цэнтра дадатковай адукацыі дзяцей і моладзі пачнецца рэалізацыя праграм «Актыў +», «Сям’я» і «Я здаровы». Яны аб’яднаюць мясцовыя ўстановы адукацыі, Савет ветэранаў, фізкультурна-спартыўны клуб, грамадскія арганізацыі.