У Магілёве пачалося будаўніцтва берагавой помпавай станцыі і трубаправода рачной вады для водазабеспячэння ЦЭЦ-1, паведамілі ў прэс-службе РУП «Магілёўэнерга».

Зараз на Магілёўскай ЦЭЦ-1 (філіял «Магілёўскія цеплавыя сеткі» РУП «Магілёўэнерга») для тэхналагічных патрэб выкарыстоўваецца рачная вада, якая ідзе ад водазаборнай помпавай станцыі, якая знаходзіцца на балансе ААТ «Магілёўхімвалакно». Водазабор эксплуатуецца з 1948 года. Абсталяванне электразабеспячэння, сілкавальныя кабелі фізічна і маральна састарэлі і патрабуюць замены, таму і было прынята рашэнне пабудаваць сучасную помпавую станцыю. Ад ЦЭЦ-1 атрымліваюць цяпло больш за 1,2 тыс. спажыўцоў цеплавой энергіі, у тым ліку аб'екты сацсферы, жылы фонд, медустановы, дзіцячыя дашкольныя і школьныя ўстановы.

У 2017 годзе РУП «Белндпіэнергапрам» распрацавала архітэктурны праект новага аб'екта. Згодна з ім вада, што праступіла ў прыёмны коўш, будзе напаўняць затоплены водапрыёмнік, адкуль па двух самацёчных вадаводах Ду350 мм даўжынёй 50 м паступіць у аванкамеру берагавой помпавай станцыі і далей паўпаглыбнымі помпамі першага пад’ёму па двух вадаводах Ду250 будзе падавацца на Магілёўскую ЦЭЦ-1.

Берагавая помпавая станцыя прадугледжваецца зблакаванай з памяшканнем для электратэхнічнага абсталявання і шафаў кіравання і складаецца з падземнага і верхняга збудаванняў. Яе сістэма кіравання выканана на базе мікрапрацэсарнай тэхнікі і будзе ўваходзіць складовай часткай у АСК ТП Магілёўскай ЦЭЦ-1. Асноўны рэжым кіравання абсталяваннем і тэхналагічным працэсам аўтаматызаваны.

Будаўнікі ўжо праклалі трубаправоды і сілавыя кабелі па тэрыторыі ЦЭЦ-1, адсыпалі фундамент дамбы прыёмнага каўша, манціруюць аванкамеру і прыёмны калодзеж, а таксама працягваецца закупка адсутнага абсталявання. Увесці ў строй новы аб'ект плануецца ў верасні бягучага года.

БЕЛТА