Рэспубліканскі семінар па выкананні арганізацыйна-тэхналагічных нарматываў пры вытворчасці сельскагаспадарчай прадукцыі пройдзе 24 кастрычніка ў Беларускай дзяржаўнай сельскагаспадарчай акадэміі (Горкі), паведамілі ў пракуратуры Магілёўскай вобласці.

У мерапрыемстве плануецца ўдзел намесніка Генеральнага пракурора Беларусі Аляксандра Лашына, міністра сельскай гаспадаркі і харчавання Леаніда Зайца, намеснікаў старшыняў аблвыканкамаў, якія курыруюць пытанні развіцця сельскай гаспадаркі, прадстаўнікоў КДК і МУС.

«Правядзенне мерапрыемства абумоўлена неабходнасцю выпрацоўкі ўзгодненага падыходу пры правядзенні праверак, інфармавання пракурораў аб праблемах, якія ўзнікаюць у правапрымяняльнай практыцы, і аптымальных алгарытмах іх вырашэння», – растлумачылі суразмоўцы.

Паводле іх слоў, аналіз правапрымяняльнай практыкі сведчыць, што парушэнні на прадпрыемствах АПК атрымалі шырокае распаўсюджванне, але не ва ўсіх выпадках ім даецца належная прававая ацэнка з ліквідацыяй як наступстваў супрацьпраўнай дзейнасці, так і іх прычын і ўмоў. Нараўне з недастатковым узроўнем тэхналогіі вытворчасці і слабой арганізацыяй кіравання на развіццё сельскай гаспадаркі адмоўна ўплывае сістэмнае ігнараванне тэхнічных нарматыўных актаў – тэхрэгламентаў як у сферы жывёлагадоўлі, так і раслінаводства, уключаючы працэс нарыхтоўкі і захоўвання кармоў.

Падчас семінара плануецца абмеркаваць праблемныя пытанні ў аграрнай галіне і меры па іх вырашэнні, у тым ліку з выкарыстаннем сродкаў пракурорскага нагляду.

БЕЛТА