Семінар Палаты прадстаўнікоў Нацыянальнага сходу на тэму «Практыка прымянення крымінальна-выканаўчага заканадаўства Беларусі ў дачыненні да непаўналетніх асуджаных, павышэнне эфектыўнасці іх рэсацыялізацыі і сацыяльнай адаптацыі» адбудзецца сёння ў Бабруйску.

У мерапрыемстве плануюць прыняць удзел старшыня Палаты прадстаўнікоў Уладзімір Андрэйчанка, намеснік старшыні Вярхоўнага суда Руслан Аніскевіч, намеснік генеральнага пракурора Беларусі Аляксей Стук, намеснік міністра ўнутраных спраў – начальнік міліцыі грамадскай бяспекі Мікалай Мельчанка, начальнік Дэпартамента выканання пакаранняў МУС Алег Маткін, старшыня Пастаяннай камісіі Савета Рэспублікі па заканадаўстве і дзяржаўным будаўніцтве Ала Бадак, дырэктар Нацыянальнага цэнтра заканадаўства і прававых даследаванняў Вадзім Іпатаў, першы намеснік міністра аховы здароўя Дзмітрый Піневіч, першы намеснік міністра працы і сацыяльнай абароны Андрэй Лабовіч, старшыня Бабруйскага гарадскога Савета дэпутатаў Міхаіл Жалудоў, намеснік старшыні Бабруйскага гарвыканкама Ігар Кісель, кіраўнікі адміністрацый Ленінскага і Першамайскага раёнаў Бабруйска Аляксандр Лісоўскі і Юрый Хілінскі, дэпутаты Палаты прадстаўнікоў.

Падчас практычнай часткі семінара запрошаныя парламентарыі азнаёмяцца з умовамі ўтрымання асуджаных у выхаваўчай калоніі №2. Далей у клубе папраўчай установы пройдзе пленарнае пасяджэнне, на якім будуць абмяркоўвацца праблемы рэалізацыі дзяржаўнай палітыкі ў галіне выканання крымінальных пакаранняў непаўналетніх, іх рэсацыялізацыі і сацыяльнай адаптацыі.