Прадпрыемствы Магілёўскай вобласці ў складзе адзінай беларускай экспазіцыі прадставяць мэблю і прадукцыю дрэваапрацоўкі на выставе ў Кёльне (Германія) падчас Міжнароднай мэблевай выставы IMM Cologne 14-20 студзеня. Пра гэта паведамілі ў выставачным унітарным прадпрыемстве «Белінтэрэкспа» Беларускай гандлёва-прамысловай палаты.

Наш рэгіён прадставяць ААТ «Магілёўдрэў» і «ФанДАК», ТАА «Алмаз-Люкс»і ІП «Баро».

Прэзентацыйная пляцоўка ў 200 кв. м будзе вытрымана ў стылі сучаснай беларускай кватэры з кухняй, гасцёўняй, спальнямі, гардэробнай і пярэднім пакоем. Тут пройдуць семінары і прэзентацыі з удзелам старшыні праўлення Асацыяцыі прадпрыемстваў мэблевай і дрэваапрацоўчай прамысловасці Беларусі Валерыя Бушылы, намесніка старшыні канцэрна «Беллеспаперапрам» Міхаіла Касько, пасла Беларусі ў Германіі Дзяніса Сідарэнкі.

Удзел беларускіх вытворцаў мэблі ў найбуйнейшай міжнароднай мэблевай выставе IMM Cologne арганізуецца пад эгідай канцэрна «Беллеспаперапрам» сумесна з Асацыяцыяй прадпрыемстваў мэблевай і дрэваапрацоўчай прамысловасці, кіруючай кампаніяй холдынгу арганізацый дрэваапрацоўчай прамысловасці і Беларускай гандлёва-прамысловай палатай. Арганізатар калектыўнай экспазіцыі – выставачнае ўнітарнае прадпрыемства «Белінтэрэкспа» БелГПП.