Першы беларуска-японскі эканамічны форум пройдзе ў Токіа 10-11 мая, паведамілі ў Нацыянальным агенцтве інвестыцый і прыватызацыі.

«Мерапрыемства стартуе ў Токіа, другі дзень форуму пройдзе на дзелавой пляцоўцы ў горадзе Осака. Мэта форуму – актывізацыя інвестыцыйнага і рэгіянальнага супрацоўніцтва з Японіяй», – адзначылі ў НАІП.

У склад беларускай дэлегацыі ўвойдуць кіраўнікі Міністэрства аховы здароўя, НАІП, БелТПП, Магілёўскага аблвыканкама, СЭЗ «Магілёў», СЗАТ «Кампанія па развіцці індустрыяльнага парку». Да ўдзелу ў форуме запрошаны ініцыятары інвестыцыйных праектаў, а таксама прадстаўнікі беларускіх кампаній, якія супрацоўнічаюць з японскімі партнёрамі.

Праграма форуму прадугледжвае выступленні афіцыйных асоб дзвюх краін. Падчас мерапрыемства будуць арганізаваны прэзентацыі інвестыцыйнага патэнцыялу Беларусі, у тым ліку індустрыяльны парк «Вялікі камень», а таксама іншых інвестыцыйных праектаў, у тым ліку ў сферы машынабудавання, электрамабіляў і высокатэхналагічнага медыцынскага абсталявання.

Удзельнікам будзе прадастаўлена магчымасць азнаёміцца з перспектывамі ўзаемадзеяння з японскімі кампаніямі ў сферах інфармацыйных і тэлекамунікацыйных тэхналогій, аўтаматызацыі і робататэхнікі, вытворчасці электрамабіляў і аўтакампанентаў, інвестыцыйнага супрацоўніцтва. Акрамя таго, запланаваны дзелавыя сустрэчы ў фармаце В2В з прадстаўнікамі японскіх кампаній і дзелавых асацыяцый. Таксама ўдзельнікі форуму наведаюць вядучыя японскія кампаніі ў Токіа і Осацы.

Арганізатары форуму – Нацыянальнае агенцтва інвестыцый і прыватызацыі, пасольства Беларусі ў Японіі, Магілёўскі абласны выканаўчы камітэт пры падтрымцы Арганізацыі садзеяння развіццю знешняга гандлю Японіі (ДЖЭТРА).

БЕЛТА