Прадстаўнікоў грамадскіх аб’яднанняў стала больш ва ўчастковых выбарчых камісіях Магілёўскай вобласці па выбарах дэпутатаў мясцовых Саветаў дваццаць восьмага склікання, паведамілі ў абласным выбаркаме.

У параўнанні з папярэднімі выбарамі ў мясцовыя Саветы прадстаўнікоў грамадскіх аб’яднанняў вылучана ў склад участковых выбарчых камісій больш на 7,5%. Яны склалі амаль палову агульнай колькасці членаў участковых выбаркамаў – 3681, або 44,8%. Ад грамадзян шляхам падачы заяў у камісіях будуць працаваць 3204 чалавекі (39%), ад працоўных калектываў – 1330 (16,2%).

Самым шматлікім на участках для галасавання будзе прадстаўніцтва Федэрацыі прафсаюзаў – 1042 члена камісій (12,7%). РГА «Белая Русь» дэлегавала ва ўчастковыя выбаркамы 557 (6,8%) сваіх прадстаўнікоў, БРСМ – 472 (5,7%), Беларускі саюз жанчын – 419 (5,1%), Беларускае грамадскае аб’яднанне ветэранаў – 401 (4, 9%).

Прадстаўнікамі палітычных партый з’яўляюцца 49 членаў камісій, у тым ліку 37 – ад Рэспубліканскай партыі працы і справядлівасці, 12 – ад Камуністычнай партыі Беларусі.

Усяго ў 750 участковых выбарчых камісій Магілёўскай вобласці ўвайшло 8215 чалавек. Камісіі сфарміраваны ў складзе ад 5 да 19 чалавек.

У адпаведнасці з каляндарным планам выбараў 8 студзеня заканчваецца вылучэнне кандыдатаў у дэпутаты. Па стане на сённяшнюю раніцу ва ўсе ўзроўні Саветаў было вылучана больш за 5 тыс. прэтэндэнтаў на дэпутацкі мандат.

Усяго ў Магілёўскай вобласці неабходна абраць 2556 дэпутатаў мясцовых Саветаў, у тым ліку ў абласны Савет – 55, раённыя – 675, гарадскія – 80, сельскія – 1746.