Прадукцыя Быхаўскага кансервава-агароднінасушыльнага завода можа апынуцца на прылаўках Японіі ўжо ў найбліжэйшыя месяцы. Засталося дапрацаваць тэхнічныя пытанні паставак. Пра гэта паведаміла антыкрызісны кіраўнік ААТ «Быхаўскі кансервава-агароднінасушыльны завод» Таццяна Корань.

Японскага спажыўца зацікавілі быхаўскія ягадныя прысмакі: клубнічнае і парэчкавае варэнне; журавіны, працёртыя з цукрам. Дамовіліся аб пастаўках васьмі найменняў бярозавага соку, у тым ліку з даданнем настояў мясцовых траў: мелісы, чабору. Акрамя таго, у Краіну Узыходзячага Сонца адправіцца зялёны кансерваваны гарошак.

Геаграфія экспартных паставак прадукцыі Быхаўскага кансервава-агароднінасушыльнага завода пастаянна пашыраецца. «Больш за 20 краін ведае нашу прадукцыю, Геаграфія шырокая – ад Канады да Аўстраліі. Асвойваем новыя рынкі, працуем з Акадэміяй навук у частцы выпуску новай прадукцыі. За тры гады для прадпрыемства 27 відаў новай прадукцыі – гэта нямала», – адзначыла Таццяна Корань.

ТРК «Магілёў»