У сувязі з пажаранебяспечным становішчам у экасістэмах, а таксама напярэдадні працяглых выхадных дзён абласное ўпраўленне МНС сумесна з абласным радыё «Радыё Магілёў» запускае праект-віктарыну «Вожык таксама хоча жыць!». Пра гэта паведаміла старшы інспектар абласнога ўпраўлення МНС Вольга Нехарошых.

Галоўная мэта мерапрыемства – праз гумар і логіку дастукацца да кожнага і растлумачыць, чым небяспечныя пажары сухой расліннасці і да якіх трагічных наступстваў для прыроды і людзей яны могуць прывесці.

Віктарына стартуе 20 красавіка. У ранішнім эфіры дыджэі радыё агучаць умовы. У суполцы УКантакце «Радыё Магілёў» будзе размешчана карцінка-карыкатура, адзін з фрагментаў якой схаваюць. Той, хто правільна адгадае яго, атрымае падарунак-сувенір ад МНС. Карцінка з’явіцца раніцай, а вынікі падвядуць бліжэй да абеду. Віктарына будзе працягвацца 5 дзён.

«Настройвайце радыёпрыёмнікі на хвалю «Радыё Магілёў», сачыце за ранішнімі эфірамі, выбудоўвайце лагічны ланцужок і перамагайце! Прымаючы ўдзел у конкурсе, вы ўносіце свой уклад у папярэджанне пажараў па прычыне выпальвання сухой расліннасці і ў абарону прыроды ад агню», – адзначыла Вольга Нехарошых.