Спектакль «Спадары, таварышы, сволачы і дамы» рыхтуе Магілёўскі абласны драматычны тэатр. Прэм’ерныя паказы адбудуцца 1, 2, 3, 9, 10 і 23 лютага на малой сцэне тэатра, паведамілі карэспандэнту сайта ў адміністрацыі ўстановы культуры.

Над пастаноўкай па п’есе Віктара Ляпіна працуе заслужаны артыст Беларусі, акцёр драмтэатра Васіль Галец. Заяўлены жанр – сучасныя вадэвілі. «Мы раскажам і пакажам пяць жыццёвых гісторый пра розных людзей, якія імкнуцца да шчасця. Натуральна, што кожны яго разумее па-свойму, – адзначылі суразмоўцы. – Ніякіх мараляў і мудрагелістых тэзісаў у спектаклі не будзе. Паспрабуем разабрацца з гэтай найскладанейшай праблемай проста, нязмушана, гулліва, іранічна і з агеньчыкам. Вішанькай на гэтым гумарыстычным тэатральным дэсерце стануць песні, якія напісаў паэт і кампазітар Аляксандр Баль».

У спектаклі будуць занятыя: Васіль Галец, Ірына Дунчанка, Аляксандр Мацюшка, Марыя Рудакова, Данііл Самкнулаў, Галіна Угначова, Аляксей Цыбін, Дзмітрый Дудкевіч, Вольга Насулька, Кацярына Кандалёва, Мікалай Раманоўскі.