Раённы фестываль народнай творчасці «Крыніца душы» адбудзецца 20 кастрычніка ў Цэнтры культуры ДУК «Цэнтралізаваная клубная сістэма Касцюковіцкага раёна». Пра гэта карэспандэнту сайта паведамілі ў Магілёўскім абласным метадычным цэнтры народнай творчасці і культурна-асветніцкай працы.

У форуме прымуць удзел творчыя калектывы і індывідуальныя выканаўцы сельскіх клубных устаноў. Па ўмовах конкурсу праграма выступлення павінна быць пабудавана з улікам усіх жанраў мастацтва (харэаграфічны, вакальна-харавы, тэатральны, інструментальны і інш.) І ўключаць песні грамадзянска-патрыятычнай накіраванасці, фальклорныя, беларускія народныя, сучасныя эстрадныя песні і аўтарскія творы (песні, вершы, музыка).

Творчыя калектывы будуць ацэньваць па наступных намінацыях: харэаграфічныя, тэатральныя і вакальна-харавыя калектывы (хоры, ансамблі), індывідуальныя выканаўцы (сольны спеў, гарманісты, мастацкае чытанне), выканаўцы беларускай народнай песні, фальклорнага, аўтарскага твораў, вядучыя, майстры дэкаратыўна-прыкладнога мастацтва, рэжысура, сатыра і гумар.

Гасцей і ўдзельнікаў мерапрыемства традыцыйна запросіць у залу гімн форуму – «Фестывальная», аўтарам якога з’яўляецца мастацкі кіраўнік Муравільскага СДК Наталля Кірыенка. У фае пройдзе выстава дэкаратыўна-прыкладнога мастацтва майстроў раёна.

У гэтым годзе фестываль народнай творчасці «Крыніца душы» адбудзецца ў дванаццаты раз. Асноўная задача форуму – захаванне і развіццё найлепшых узораў народнай творчасці, нематэрыяльнай культурнай спадчыны раёна, папулярызацыя традыцыйнай мастацкай культуры і яе ўключэнне ў формы сучаснай культуры.