Рэгістратары пачнуць адпрацоўку адрасоў для перапісу насельніцтва ў лістападзе бягучага года. Пра гэта паведаміла журналістам старшыня Нацыянальнага статыстычнага камітэта Беларусі Іна Мядзведзева.

«У лістападзе гэтага года рэгістратары пройдуць усе жылыя і нежылыя памяшканні, у кожнага на планшэце будзе загружаны ўчастак для адпрацоўкі. Але перш трэба ўдакладніць дадзеныя па адраснай гаспадарцы, зараз робіцца велізарная праца сумесна з органамі ўлады, ЖКГ, МНС», – распавяла Іна Мядзведзева.

У цяперашні час прадстаўнікі органаў дзяржаўнай статыстыкі сумесна з ЖКГ робяць абыход адраснай гаспадаркі і там, дзе знаходзяць недахопы (адсутнасць таблічак на дамах, нумарацыі, асабліва ў прыватным сектары), звяртаюцца да самога домаўладальніка, самі трафарэтам наносяць нумар. «Гэтая праца важная, таму што дапамагае арыентавацца на мясцовасці тым жа экстраным службам», – адзначыла Іна Мядзведзева.

Сама маштабная праца па перапісе насельніцтва пройдзе ў кастрычніку 2019 года. «Часовы перапісны персанал будзе падбірацца сумесна з гар- і райвыканкамамі. Гэта будуць студэнты, работнікі дзяржарганізацый і, вядома, органаў дзяржстатыстыкі», – дадала кіраўнік Белстата.

Дзякуючы таму, што частка насельніцтва будзе ўдзельнічаць у інтэрнэт-перапісе, атрымалася скараціць колькасць людзей, якія прыцягваюцца для надомнага апытвання, з 46 тыс. да 10 тыс. У кожнага з іх будзе планшэт плюс прыкладна 2 тыс планшэтаў плануецца мець у рэзерве.

БЕЛТА