Рэгіянальная міжведамасная прафілактычная акцыя «Азбука бяспечнага лета» стартуе 26 мая ў Магілёўскай вобласці. Пра гэта паведамілі ва ўпраўленні адукацыі аблвыканкама.

Да 31 жніўня праца ўсіх зацікаўленых службаў і ведамстваў (камісіі па справах непаўналетніх, упраўленняў унутраных спраў, аховы здароўя, галоўнага ўпраўлення па ідэалагічнай рабоце, культуры і справах моладзі, абласнога ўпраўлення МНС), а таксама грамадскіх арганізацый будзе накіравана на стварэнне аптымальных умоў, якія арганізоўваюць бяспечны адпачынак дзяцей у перыяд летняй аздараўленчай кампаніі. Мерапрыемствы, якія праводзяцца падчас акцыі, паспрыяюць фарміраванню культуры паводзін і арганізацыі вольнага часу, здаровага ладу жыцця, бяспечнай жыццядзейнасці.

Адкрые міжведамасны праект сход абласнога бацькоўскага актыву, які адбудзецца 26 мая ў 10.00 на базе ДУА «Гімназія №3 г. Магілёва» (вул. Ленінская, 41). Мерапрыемства пройдзе ў форме палілогу. Тут плануецца абмеркаваць пытанні арганізацыі аздараўлення і занятасці дзяцей і падлеткаў у летні перыяд. Асаблівую ўвагу ўдзеляць прафілактыцы безнагляднасці і правапарушэнняў непаўналетніх, алка- і наркаспажывання, дзіцячага дарожна-транспартнага траўматызму, гібелі і траўмавання дзяцей на пажарах, вадзе, паблізу чыгункі. Бацькі змогуць задаць пытанні экспертам па фарміраванні здаровага ладу жыцця, папярэджанні інтэрнэт-залежнасці, суіцыдальных паводзін і інш.