Міністэрства культуры сумесна з цэнтрам культуры «Віцебск» -дырэкцыяй Міжнароднага фестывалю мастацтваў «Славянскі базар у Віцебску», аблвыканкамамі, Мінскім гарвыканкамам пачынаюць падрыхтоўку да правядзення адборачных тураў XXVIII Міжнароднага конкурсу выканаўцаў эстраднай песні «Віцебск-2019» і ХVII Міжнароднага дзіцячага музычнага конкурсу«Віцебск-2019». Пра гэта паведамілі ў дырэкцыі фестывалю.

Старт рэгіянальным адборачным турам галоўных конкурсаў форума будзе дадзены 5 снежня ў Гродне. Магілёўшчына прыме эстафету рэгіянальных тураў 11 снежня (аўторак). Праслухоўванне пачнецца ў 11.00 у абласным метадычным цэнтры культурна-народнай творчасці і асветнай працы (вул. Першамайская, 10). Тэлефон для даведак (8029) 745 43 08.

Для ўдзелу ў конкурсных адборах выканаўцам неабходна прадставіць па дзве кампазіцыі: эстрадную песню беларускага аўтара на беларускай мове (для ўдзельнікаў дзіцячага музычнага конкурсу і конкурсу выканаўцаў эстраднай песні), эстрадную песню па выбары ўдзельніка, якая найбольш ярка адлюстроўвае яго выканальніцкае майстэрства і артыстычныя здольнасці (для ўдзельнікаў дзіцячага музычнага конкурсу) і эстрадную песню кампазітара славянскай краіны на адной са славянскіх моў альбо сусветны хіт (для ўдзельнікаў конкурсу выканаўцаў эстраднай песні).

У саставы журы ў рэгіёнах увойдуць вядучыя спецыялісты ў галіне эстраднага мастацтва, прадстаўнікі дзяржаўных органаў і ўстаноў культуры, папулярныя артысты беларускай эстрады, музычныя прадзюсары, Кампазітары, рэжысёры – ураджэнцы рэгіёнаў, у якіх праводзіцца адбор.

Падчас конкурсных праслухоўванняў ужо вядомыя артысты правядуць майстар-класы для канкурсантаў. Яны стануць настаўнікамі для ўсіх удзельнікаў, падзеляцца ўласным вопытам узыходжання на прафесійную сцэну і агучаць рэальныя рэкамендацыі, як заваяваць гледача.

У дырэкцыі фестывалю акцэнтавалі ўвагу на тым, што ў адборачным этапе могуць паспрабаваць свае сілы ўсе ахвотныя незалежна ад музычнай адукацыі. З усіх мінулых рэгіянальныя камісіі адбяруць затым па пяць сваіх прадстаўнікоў на другі этап адбору, які адбудзецца ў студзені-лютым. Спецыяльная камісія вызначыць дзясятку фіналістаў. З іх да канца сакавіка на трэцім этапе вызначаць прадстаўнікоў Беларусі для ўдзелу ў музычных конкурсах фестывалю.

У 2019 годзе «Славянскі базар у Віцебску» пройдзе з 11 па 15 ліпеня. Дадатковыя мерапрыемствы форуму запланаваны на 9,10 і 16,17 ліпеня.