Рэгіянальны этап спартыўна-патрыятычнай гульні «Зарніца» збярэ 170 школьнікаў з усёй вобласці. Аб гэтым карэспандэнту сайта паведаміла старшыня Магілёўскага абласнога савета ГА «БРПА» Алена Малдаванава.

Гульня пройдзе 7 чэрвеня на тэрыторыі вайсковай часцяі 72471. Сюды прыбудзе 17 каманд – пераможцаў раённых этапаў гульні. У складзе кожнай з іх – па 10 чалавек ва ўзросце 13-14 гадоў.

На працягу дня юныя армейцы (менавіта так называюць школьнікаў у момант гульні) будуць спаборнічаць у ваеннай паласе перашкод, разборцы і зборцы аўтамата Калашнікава, стральбе з пнеўматычнай вінтоўкі, удзельнічаць у аглядзе-конкурсе строю і песні. Таксама школьнікі змогуць азнаёміцца з узорамі стралковай зброі і падводнага рыштунку на тэматычнай выставе.

У ліку арганізатараў мерапрыемства – Магілёўскі абласны савет ГА «БРПА», галоўныя ўпраўленні ідэалагічнай работы і па справах моладзі, адукацыі, спорту і турызму Магілёўскага аблвыканкама, Магілёўская абласная арганізацыйная структура «Добраахвотнае таварыства садзеяння арміі, авіяцыі і флоту», ваенны камісарыят Магілёўскай вобласці.