На ААТ «Магілёўхімвалакно» за 9 месяцаў 2018 года выдаткавана Br116,3 тыс.на прэміраванне работнікаў за высокія дасягненні па распрацоўцы і рэалізацыі мер па ахове працы. У 2017-м гэта сума складала Br108,3 тыс., адзначыў старшыня прафкама прадпрыемства Уладзімір Падабед на адкрыцці Рэспубліканскага злёту грамадскіх інспектараў працы арганізацый нафтахімічнай і горназдабыўной прамысловасці.

У сваю чаргу, выдаткі на фінансаванне сістэмы прафілактычнай работы па ахове працы ў 2017 годзе склалі Br121, 5 тыс., удакладніў ён.

«На прамысловым гіганце на 1 лістапада 2018 года працавалі 5704 чалавекі – адзначыў Уладзімір Падабед. – За бяспекай іх працы сочаць 373 грамадскія інспектары працы, з якіх 319 чалавек-рабочыя і 54 спецыялісты. Згодна з калектыўнай дамовай, кожнаму інспектару прадастаўляецца ў тыдзень мінімум 4 гадзіны на ажыццяўленне грамадскага кантролю за станам умоў і аховы працы. Толькі ў 2017 годзе яны правялі амаль 73,4 тыс. праверак і выявілі больш за 35 тыс. парушэнняў».

Для стымулявання работнікаў у галіне аховы працы на ААТ «Магілёўхімвалакно» праводзяцца адпаведныя конкурсы: «Найлепшы грамадскі інспектар па ахове працы», «Найлепшы старшыня камісіі па ахове працы»,«Найлепшы прафсаюзны камітэт па ахове працы». Таксама падводзяцца вынікі агляду-конкурсу сярод структурных падраздзяленняў арганізацыі на самую лепшую пастаноўку прафілактычнай работы па забеспячэнні бяспечных умоў працы, ахове здароўя і прамысловай бяспекі. Грамадскія інспектары прадпрыемства рэгулярна становяцца найлепшымі на рэспубліканскім узроўні.

Паводле слоў намесніка старшыні Рэспубліканскага камітэта Белхімпрафсаюза Валерыя Цітова, на магілёўскім прадпрыемстве створана дзейсная сістэма грамадскага кантролю і стымулявання работнікаў па стварэнні бяспечных умоў працы. Менавіта таму першы рэспубліканскі злёт грамадскіх інспектараў працы праводзіцца на яго плошчах.

«Наша задача – пазнаёміцца з вопытам работы на ААТ «Магілёўхімвалакно», а таксама абмеркаваць тэмы і праблемныя пытанні, якія сёння маюць месца на нашых прадпрыемствах і якія перад намі ставіць жыццё», – падкрэсліў ён.

Аб актуальнасці правядзення семінараў і злётаў па ахове працы гаварыла ў сваім выступленні намеснік старшыні Магілёўскага абласнога аб’яднання прафсаюзаў Людміла Старасціна. «Праблеме аховы працы надаецца вялікая ўвага як з боку прафсаюзаў і наймальнікаў, так і з боку выканаўчай улады, – адзначыла яна. – Тым не менш, сёлета наша сумесная праца не дазволіла знізіць у рэгіёне ўзровень вытворчага траўматызму: 17 смяротных выпадкаў супраць 14 у 2017 годзе і 99 цяжкіх выпадкаў супраць 66».

Рэспубліканскі злёт грамадскіх інспектараў працы арганізацый нафтахімічнай і горназдабыўной прамысловасці сабраў у Магілёве 60 удзельнікаў з усёй рэспублікі, у тым ліку прадстаўнікоў Міністэрства працы і сацыяльнай абароны, прафсаюзаў, пракуратуры, Следчага камітэта і іншых зацікаўленых структур. На прыкладзе прамысловага гіганта яны знаёмяцца з практыкай работы па ажыццяўленні грамадскага кантролю за выкананнем наймальнікамі заканадаўства аб ахове працы, арганізацыі працоўных месцаў і санітарна-бытавымі ўмовамі на вытворчасці.

У межах мерапрыемства разглядаюцца праблемныя пытанні пры ажыццяўленні ў арганізацыях грамадскага кантролю па ахове працы, расследавання няшчасных выпадкаў і фарміравання культуры бяспекі на вытворчасці, развіцця сістэмы страхавання ад няшчасных выпадкаў. Таксама ў праграме – агляд беларускага заканадаўства па ахове працы, прэзентацыя глабальнай кампаніі канцэпцыі «нулявога траўматызму», вывучэнне практыкі добраахвотнага страхавання адказнасці наймальніка ў сувязі з няшчаснымі выпадкамі на вытворчасці.