Дні вострава Сардзінія пройдуць 8-9 верасня ў Бабруйску, паведамілі ў аддзеле культуры гарвыканкама.

За круглым сталом 8 верасня бабруйскія медыкі абмяркуюць актуальную тэму даўгалецця з удзелам экспертаў і прэзідэнта Сусветнай супольнасці даўгалецця Раберта Пілі. Гэтая арганізацыя створана на Сардзініі для вывучэння і ацэнкі пытанняў даўгалецця і прапаганды актыўнага ладу жыцця сярод насельніцтва сталага ўзросту. Сардзінія ўваходзіць у сусветны спіс «блакітных зон» – пяці рэгіёнаў свету з найбольшай колькасцю доўгажыхароў.

Прадстаўнікі Сусветнай супольнасці даўгалецця 9 верасня сустрэнуцца з футбольнай камандай Бабруйска, а італьянскія музыканты выступяць для гараджан у маладзёжным парку. Усіх чакае майстар-клас па танцах і выступленне Эмануэле Гарау з яго ансамблем. А на тэлеканале «Бабруйск 360» пакажуць тэлеверсію майстар-класа ад спецыяліста па нацыянальных сардзінскіх стравах, повара Сімоне Мелоні.

«Мерапрыемствы з удзелам італьянскіх гасцей праводзяцца ў межах дасягнутых дамоўленасцей аб супрацоўніцтве з аўтаномным рэгіёнам Сардзінія, а таксама рэалізацыяй дагавора аб пабрацімстве Бабруйска і італьянскага горада Іглезіяса, падпісанага ў 2017 годзе», – адзначылі ў аддзеле культуры.

Сардзінія – другі па велічыні востраў у Міжземным моры. Любімае месца для турыстаў, Сардзінія пры гэтым з’яўляецца высокаразвітым прамысловым аўтаномным рэгіёнам Італіі.

БЕЛТА