Філіял «Домабудаванне»РУП «Завод газетнай паперы» (Шклоў) падчас V беларуска-французскага бізнес-форума ў Мінску падпіша пагадненне з французскай кампаніяй SARL Logibat аб пастаўцы ў 2018-2019 гадах каля 60 камплектаў каркасна-шчытавых дамоў на агульную суму 1 млн еўра. Пра гэта паведамілі ў прэс-службе канцэрна «Беллеспаперапрам».

Некаторыя дамы будуць складацца з некалькіх кватэр.

Кампанія SARL Logibat робіць забудову жылых пасёлкаў на тэрыторыі Францыі. Адкрыццё чарговага з іх адбудзецца 6 лістапада. Усе збудаванні ў гэтых пасёлках ўзводзяцца з драўніны. Дамы пастаўляюцца з Беларусі.

Першыя два дамы з беларускага Шклова адправілі ў Францыю яшчэ ў 2015 годзе. З гэтага часу ўжо пастаўлена больш за сотню дамоў і іншых пабудоў. У планах прадпрыемства ў найбліжэйшыя пяць гадоў рэалізаваць у Францыю каля 650 дамоў.

Філіял «Домабудаванне»– беларуская вытворчасць, якая выкарыстоўвае найноўшыя тэхналогіі і абсталяванне вядучых еўрапейскіх вытворцаў для вырабу піламатэрыялаў іглічных парод, вырабаў з драўніны, брусу клеенага, камплектаў каркасна-панэльных (шчытавых) дамоў і дамоў з клеенага брусу. За студзень-жнівень прадпрыемствы галіны экспартавалі ў Францыю прадукцыі на $ 3 млн, што на 43,2% больш, чым за аналагічны перыяд мінулага года. Аснову экспарту ў Францыю склалі мэбля, канструкцыі і будматэрыялы для дамоў, дзверы і вокны драўляныя. Экспартуюцца таксама піламатэрыялы, фанера, драўняныя пліты (ДСП і ДВП), папера, кардон і інш.

БЕЛТА