Працаўнікам Шклоўскага раёна сёння ўручылі падзяку ад старшыні Магілёўскага аблвыканкама Уладзіміра Даманеўскага у сувязі з намалотам 100 тыс. т збожжа.

Ва ўрачыстай цырымоніі, якая адбылася ў вёсцы Новыя Камсенічы, прынялі ўдзел прадстаўнікі кіраўніцтва Магілёўскага аблвыканкама і Шклоўскага райвыканкама, кіраўнікі гаспадарак Шклоўскага раёна, механізатары і вадзіцелі, занятыя на адвозцы збожжа, найлепшыя фермеры.

«Мне вельмі прыемна прысутнічаць на такой знакавай падзеі, – адзначыў старшыня Магілёўскага аблвыканкама Уладзімір Даманеўскі. – У вобласці ўборачная гарачая пара збожжавых падыходзіць да завяршэння – засталося ўбраць каля 6% пасяўных плошчаў. Прыемна тое, што ў вельмі няпростых пагодных умовах, якія характарызуюцца недаборам ураджаю збожжавых і зернебабовых культур, мы сёння сустрэліся па добрай нагодзе: кадры Шклоўскага раёна ў чарговы раз пацвердзілі свой прафесіяналізм, мужнасць і імкненне паказаць, як трэба працаваць на зямлі і ў няпростых умовах дабівацца высокіх вынікаў».

Па словах губернатара, сімвалічна і тое, што гэтая сустрэча праходзіць у фермерскай гаспадарцы «Новы быт» Аляксандра Канавалава, які прыняў працоўную эстафету ад свайго бацькі. «Такая пераемнасць пакаленняў і жаданне працаваць на зямлі гаворыць пра тое, што праца хлебароба карыстаецца вялікай павагай і ўсяляк падтрымліваецца. І я ўпэўнены, што і ў далейшым людзі з задавальненнем будуць працаваць на сваёй малой радзіме, дабівацца высокіх вынікаў», – упэўнены Уладзімір Даманеўскі.

Старшыня аблвыканкама цёпла падзякаваў найлепшым працаўнікам Шклоўскага раёна за дасягнутыя вынікі і ўручыў старшыні Шклоўскага райвыканкама Васілю Віцюнову падзяку ў сувязі з намалотам 100 тыс. т збожжа. У сваю чаргу старшыня райвыканкама перадаў губернатару сімвалічны сноп каласоў сёлетняга ўраджаю, а перадавік-механізатар Віктар Мільто (ААТ «Александрыйскае») – хлебны каравай.

Кіраўнікам сельгасарганізацый, найлепшым фермерам, механізатарам і вадзіцелям, занятым на адвозцы збожжа Шклоўскага раёна, былі ўручаны граматы, а таксама хлебныя караваі з першага ўраджаю.

БЕЛТА

Фота - БЕЛТА