Усе школы і гімназіі Магілёва ў новым навучальным годзе ўвядуць праект «Электронная школа». Пра гэта паведаміла начальнік упраўлення адукацыі Магілёўскага гарвыканкама Ірына Новікава.

«Фарміраванне адукацыйнага асяроддзя ўжо з новага навучальнага года ў многіх установах адукацыі будзе ісці на аснове воблачных тэхналогій, а астатнія запусцяць праект «Электронная школа» на працягу года, – заўважыла Ірына Новікава. – Гэта не запатрабуе дадатковых сур’ёзных рэсурсаў, паколькі мы да гэтага ішлі на працягу апошніх некалькіх гадоў. Практычна кожны навучальны прадмет у нас ужо камп’ютарызаваны. Ва ўсіх школах ёсць інтэрнэт і Wi-Fi, створана лакальная сетка, таму магчымасці пераходу на новыя тэхналогіі ёсць у кожнай навучальнай установы».

Складанасць пераходу толькі ў дадатковай нагрузцы на настаўнікаў, якім некаторы час прыйдзецца весці і пісьмовы, і электронны журналы. «Пасля ўкаранення ва ўсіх установах адукацыі воблачных тэхналогій мы разлічваем значна знізіць папяровы дакументаабарот, фінансавыя выдаткі, а таксама павысіць эфектыўнасць і якасць працы», – адзначыла начальнік упраўлення адукацыі гарвыканкама.

Дзякуючы сучасным тэхналогіям у бацькоў з’явіцца магчымасць мець доступ да журнала і ацэнак сваіх дзяцей, адсочваць на адлегласці іх электронны дзённік, правяраць выкананне хатніх заданняў, а таксама падключыць іншыя інтэрнэт-паслугі.

На падрыхтоўку ўстаноў адукацыі да новага навучальнага года з гарадскога бюджэту, пазабюджэтных даходаў, спонсарскай дапамогі і дапамогі апякунскіх саветаў было накіравана больш за Вг3,5 млн. «Мы з упэўненасцю можам сказаць, што ўсе школы да 1 верасня будуць гатовы да прыёму навучэнцаў. Больш за тое, праца на гэтым не спыніцца. Мы на працягу года будзем умацоўваць матэрыяльна-тэхнічную базу і ствараць здаровае і бяспечнае асяроддзе ва ўстановах адукацыі горада», – падкрэсліла Ірына Новікава.

БЕЛТА