Сход абласнога бацькоўскага актыву «За бяспечнае лета!» адбудзецца сёння ў Магілёве на базе гімназіі №3. У мерапрыемстве, якое традыцыйна пройдзе ў форме палілога, прымуць удзел прадстаўнікі ўпраўленняў і камітэтаў аблвыканкама, УУС, МНС, АСВОДа, пракуратуры, бацькоўскай грамадскасці рэгіёна, псіхолагі і настаўнікі.

Праграмай запланавана наведванне абласнога адукацыйнага цэнтра бяспекі жыццядзейнасці, а таксама правядзенне семінара-нарады для спецыялістаў сістэмы адукацыі, дзе абмяркуюць аздараўленне, занятасць дзяцей і падлеткаў. У прыватнасці, удзельнікі актыву разгледзяць праблемныя моманты, звязаныя з арганізацыяй летняга адпачынку, у тым ліку патрабаванні санітарна-эпідэміялагічнага заканадаўства і харчавання. Таксама будуць закрануты пытанні вольнага часу ва ўстановах культуры, дзейнасць студэнцкіх атрадаў. Аб прафілактычных мерапрыемствах, накіраваных на папярэджанне надзвычайных сітуацый, супрацьпраўных паводзін непаўналетніх, спажывання псіхаактыўных рэчываў, інтэрнэт-залежнасці і крызісных станаў, мерах бяспекі на вадаёмах і дарогах нагадаюць прадстаўнікі сілавых, наглядных структур, грамадскіх арганізацый і медыцынскіх устаноў.