Трэцяя спартакіяда навучэнцаў кадэцкіх вучэльняў, спецыялізаваных ліцэяў і Мінскага сувораўскага ваеннага вучылішча па службова-прыкладных і масавых відах спорту пройдзе 20-22 лютага ў Магілёве, паведамілі ў Магілёўскім інстытуце МУС.

З усёй краіны прыедуць на спаборніцтвы найлепшыя прадстаўнікі 11 устаноў адукацыі, каб годна прадставіць сваю альма-матар на спартыўнай арэне. Тры дні ўдзельнікі будуць спаборнічаць у першынстве па міні-футболе, стральбе з пнеўматычнай вінтоўкі, трохбор’і, лыжных гонках. Пераможцаў узнагародзяць кубкамі, медалямі, дыпломамі і спецыяльнымі прызамі.

«Мы чакаем, што мерапрыемства атрымаецца традыцыйна яркім, насычаным падзеямі і неверагодным па запале, – адзначылі суразмоўцы. – Акрамя ўдзелу ў спаборніцтвах, хлопцаў чакае знаёмства з выдатнымі мясцінамі Магілёва і культурныя мерапрыемствы».

Арганізатарам спартакіяды выступае Міністэрства ўнутраных спраў. Першыя спаборніцтвы прайшлі ў 2017 годзе ў Мінску і былі прысвечаны 100-годдзю беларускай міліцыі.

БЕЛТА