Спартакіяда сярод моладзевых атрадаў аховы правапарадку грамадскай арганізацыі «Беларускі рэспубліканскі саюз моладзі» і вайскоўцаў у Магілёве пераносіцца на 1 кастрычніка. Пра гэта карэспандэнту сайта паведаміў выканальнік абавязкаў першага сакратара Ленінскай раённай арганізацыі ГА «БРСМ» Кірыл Яшчанка.

«Раней планавалася арганізаваць спаборніцтва 24 верасня, але ў сувязі з неспрыяльнымі ўмовамі надвор’я было прынята рашэнне памяняць дзень правядзення першынства, – удакладніў суразмоўца. – Усё астатняе застанецца без зменаў».

Нагадаем, спартакіяда адбудзецца на базе вайсковай часці №6713. Хлопцы паспаборнічаюць у ваеннай эстафеце, падняцці гіры, дартсе, валейболе, разборцы і зборцы зброі.

Урачыстае адкрыццё спаборніцтваў у 10.30.