Спартыўныя пляцоўкі ўстаноў адукацыі Магілёва патрабуюць пераўладкавання. Да такой высновы прыйшлі супрацоўнікі КДК пасля праверкі спартыўных аб’ектаў. Пра гэта паведаміў намеснік старшыні Камітэта дзяржаўнага кантролю вобласці Аляксей Іглікаў.

Ён адзначыў, што развіццю спорту ў рэгіёне надаецца вялікая ўвага. Разам з тым многія плоскасныя спартыўныя збудаванні школ горада на Дняпры ўжо не адпавядаюць сучасным патрабаванням, а выдзеленыя пад іх землі ў асобных выпадках выкарыстоўваюцца неэфектыўна.

«Кіраўнік дзяржавы неаднаразова падкрэсліваў важнасць развіцця спорту ў якасці аднаго з прыярытэтаў дзяржаўнай палітыкі, – падкрэсліў Аляксей Іглікаў. – На нарадзе,якая адбылася ў красавіку бягучага года па пытаннях развіцця спорту Прэзідэнт краіны даў шэраг даручэнняў па ўключэнні дзяцей у заняткі спортам, якія, на яго думку, павінны стаць неад’емнай часткай жыцця кожнага дзіцяці, пачынаючы з дзіцячага сада».

У сувязі з гэтым Камітэт дзяржкантролю лічыць, што адным са шляхоў прываблівання дзяцей і дарослых да заняткаў спортам з’яўляецца ўладкаванне тэрыторый навучальных устаноў сучаснымі спартыўнымі збудаваннямі, у тым ліку вулічнымі трэнажорамі, сказаў суразмоўца. Гэта дазволіць кардынальна палепшыць навучальны працэс на свежым паветры, а таксама прадаставіць магчымасць дарослым і дзецям, якія пражываюць паблізу школ, выкарыстоўваць дадзеную інфраструктуру па вечарах і ў выхадныя дні для заняткаў спортам.

Магілёўскаму гарвыканкаму прапанавана прапрацаваць пытанні паэтапнага ўладкавання тэрыторый навучальных устаноў горада сучаснымі спартыўнымі пляцоўкамі для гульні ў міні-футбол, валейбол, баскетбол, хакей, вулічнымі спартыўнымі трэнажорамі, а таксама наладжвання ў месцах заняткаў спортам вулічнага асвятлення. Прыняцце мер па выкананні унесеных камітэтам прапаноў узята на кантроль.