Старшакласнікі змогуць праходзіць прафпадрыхтоўку ў ССНУ і ВНУ. Гэта прадугледжана пастановай Савета Міністраў ад 2 жніўня 2018 года №575, паведамляе сайт урада.

У Палажэнне аб бесперапынным прафесійным навучанні па прафесіях рабочых ўключаны новыя нормы. Яны ўстанаўліваюць магчымасць арганізацыі працоўнага навучання для вучняў X-XI (XII) класаў устаноў агульнай сярэдняй і спецыяльнай адукацыі праз прафпадрыхтоўку не толькі ў агульнаадукацыйных установах.

Прадугледжана, што вучні X-XI (XII) класаў школ і гімназій (ліцэяў) змогуць праходзіць такое навучанне ва ўстановах прафесійна-тэхнічнай, сярэдняй спецыяльнай, вышэйшай адукацыі, дадатковай адукацыі дарослых, дзяцей і моладзі на аснове дагавораў аб прафпадрыхтоўцы рабочага (служачага) на платнай аснове.

Расходы па гэтых дагаворах будуць аплачвацца за кошт бюджэтных сродкаў устаноў агульнай сярэдняй і спецыяльнай адукацыі, прадугледжаных на працоўнае навучанне старшакласнікаў, і іншых крыніц, не забароненых заканадаўствам (даходаў устаноў агульнай сярэдняй і спецыяльнай адукацыі, атрыманых ад пазабюджэтнай дзейнасці – гурткоў на платнай аснове, арэнды памяшканняў).

Пастанова ўступае ў сілу пасля яе афіцыйнага апублікавання.

Як паведамлялася, тыпавы вучэбны план на 2018/2019 навучальны год прадугледжвае ўвядзенне ў 10 класе прадмета «Працоўнае навучанне». Раней вывучэнне гэтага прадмета завяршалася ў 9 класе. З 1 верасня вучні 10 класаў будуць атрымліваць прафесійныя навыкі, асвойваючы адукацыйную праграму прафесійнай падрыхтоўкі рабочых (служачых) у аб’ёме 6 гадзін на тыдзень.

БЕЛТА