Рэспубліканскае свята «Маладзёжная сталіца Рэспублікі Беларусь – 2018» пройдзе 8-9 лютага ў Магілёве. У мерапрыемстве прымуць удзел прадстаўнікі органаў улады, лідары моладзевых арганізацый, маладыя спецыялісты, навукоўцы, лаўрэаты міжнародных конкурсаў з ліку студэнтаў устаноў вышэйшай адукацыі, творчая моладзь горада на Дняпры.

Урачыстая цырымонія адкрыцця рэспубліканскага свята адбудзецца 8 лютага ў 13.00 у Абласным цэнтры творчасці. Падчас мерапрыемства будуць ушаноўваць пераможцаў і прызёраў гадавой Сусветнай універсіяды і ўзнагародзяць лаўрэатаў рэспубліканскага конкурсу сацыяльнай рэкламы «Маладзёжны погляд».

Папярэднічаць адкрыццю будзе выстава дасягненняў «Моладзь Магілёва: традыцыі і будучыня», дзе прэзентуюць праект «WorldSkills – старт у будучыню!» па папулярызацыі гэтага руху і павышэнні прэстыжу рабочых прафесій. Акрамя таго, для ўдзельнікаў свята падрыхтуюць экспазіцыю аб удзеле дэлегацыі Беларусі ў XIX Сусветным фестывалі моладзі і студэнтаў у Сочы.

У Абласным цэнтры творчасці таксама дадуць старт рэспубліканскаму форуму «Моладзь – надзея і будучыня Беларусі», які пройдзе адначасова на некалькіх інтэрактыўных пляцоўках. Так, у гімназіі №3 і музеі гісторыі Магілёва адбудзецца пасяджэнне Рэспубліканскай каардынацыйнай рады маладзёжных парламентаў. Плануецца, што ў мерапрыемстве прыме ўдзел Міністр адукацыі Ігар Карпенка. Таленавітая моладзь БРУ будзе здзіўляць гасцей інавацыямі і навуковымі ідэямі. Студэнты МДУХ падрыхтуюць чатыры секцыі – «Кулінарны брэнд Магілёўшчыны», «Дранікі фэст», «Мой стыль жыцця сёння – маё здароўе і поспех заўтра!», «Масленіца». На кожнай з іх хлопцы і дзяўчаты прадставяць праекты па фарміраванні прафесійнай кампетэнтнасці будучых маладых спецыялістаў. Студэнты ўніверсітэта імя А. А. Куляшова прэзентуюць секцыю «Маладосць. Актыўнасць. Поспех». Завершыць мерапрыемства танцавальны форум-рух «Ёсць кантакт!» у начным клубе «Метро».

На наступны дзень, 9 лютага, праграмай запланавана экскурсія «Магілёў вядомы і невядомы ...» з наведваннем мемарыяльнага комплексу «Буйніцкае поле», заасаду, музеяў. Таксама ў інстытуце Міністэрства ўнутраных спраў адбудзецца рэспубліканская акцыя «Моладзь разам з алімпійцамі» ў рамках адкрыцця XXIII зімовых Алімпійскіх гульняў і падвядзення вынікаў свята.

«Моладзевая сталіца» – статус, якая прысуджаецца па выніках рэспубліканскага конкурсу тэрмінам на адзін год. На працягу гэтага часу горад атрымлівае магчымасць прадэманстраваць сваю прыхільнасць сучаснай моладзевай культуры, найлепшым практыкам па развіцці сацыяльнай, эканамічнай, палітычнай актыўнасці моладзі. Спаборніцтва праводзіцца трэці год запар. Першымі гэтага ганаровага звання былі ўдастоены Баранавічы, а ў 2017 годзе эстафету пераняў Полацк. Арганізатарам і ідэйным натхняльнікам спаборніцтва выступае Міністэрства адукацыі.

У гарвыканкаме расказалі, чым увойдзе ў гісторыю знакавы для Магілёва год. Па словах суразмоўцаў, каляндар мерапрыемстваў у моладзевай сталіцы абяцае яркія і незабыўныя падзеі.