Таваразварот паміж Магілёўскай вобласцю і Нідэрландамі за чатыры месяцы 2017 года вырас больш чым на 80% у параўнанні з аналагічным перыядам мінулага года. Пра гэта паведаміў сёння журналістам старшыня Магілёўскага аблвыканкама Уладзімір Даманеўскі па выніках сустрэчы з Часовым Павераным у справах Каралеўства Нідэрландаў у Рэспубліцы Беларусь спадаром Паўлем ван Ааствейнам.

Нідэрланды актыўна працуюць з Магілёўскай вобласцю ў эканамічнай сферы. Доля дзяржавы ў знешнегандлёвым абароце па-за краінамі СНД складае 3,8%, што нямала. У апошні час назіраецца сур’ёзны рост экспартных і імпартных паставак з гэтай краінай. “Гэта сведчыць аб тым, што выстройваюцца добрыя знешнеэканамічныя сувязі, прадпрыемствы нашага рэгіёна і іх партнёры патрэбны адзін аднаму”, – падкрэсліў губернатар.

Нідэрланды пазіцыянуюць сябе як добры і надзейны інвестар, што пацвярджаецца стабільнай і паспяховай працай чатырох прадпрыемстваў, якія функцыянуюць на тэрыторыі Прыдняпроўскага краю, з часткай галандскага капіталу. За студзень-красавік сусветна вядомыя кампаніі, у ліку якіх «Хайнекен», інвеставалі ў вобласць $ 6,6 млн.

На дадзены момант Магілёўшчыну і Нідэрланды аб’ядноўваюць асабліва гандлёва-эканамічныя адносіны. Аднак бакі маюць намер развіваць і іншыя кірункі. У прыватнасці, падчас сустрэчы абмяркоўваліся магчымасці супрацоўніцтва ў сферы аховы здароўя, заснаваныя на ўзаемным абмене вопытам. Ёсць перспектывы наладжвання партнёрства ў галіне турызму.

Паўль ван Ааствейн выказаў зацікаўленасць ва ўстанаўленні моладзевых кантактаў. З гэтай мэтай дыпламат наведае сёння Магілёўскі дзяржаўны ўніверсітэт імя А.А. Куляшова, дзе сустрэнецца са студэнтамі ВНУ і выкладчыкамі.