Турыстычны злёт работнікаў Магілёўскага аблвыканкама, яго структурных падраздзяленняў, сілавых структур і ведамстваў, пракуратуры, а таксама шэрагу іншых арганізацый рэгіёна, якія ўваходзяць у прафсаюз работнікаў дзяржаўных устаноў, пройдзе з 24 па 26 жніўня ў Чавускім раёне на базе спартыўна-аздараўленчага цэнтра «Рудэя». За прызавыя месцы будзе змагацца каля 200 чалавек у складзе 10 каманд.

Праграма шостага турзлёту ўключыць у сябе шэраг спартыўных выпрабаванняў і конкурсных залікаў. Так, удзельнікам трэба будзе прайсці камбінаваны турыстычны маршрут і прадэманстраваць тэхніку воднага турызму, пазмагацца ў настольным тэнісе, дартсе, пляжным валейболе і рыбнай лоўлі, згуляць у шашкі, лепш за ўсіх арганізаваць побыт і арыгінальна прадставіць сваю каманду.

Сярод пазазаліковых выпрабаванняў – сямейная жартоўная эстафета «Тата, мама і я», конкурс на самае лепшае выкананне турысцка-патрыятычнай песні і кулінарнае спаборніцтва па падрыхтоўцы на вогнішчы найлепшай паходнай стравы.

Па выніках усіх спаборніцкіх этапаў каманды-пераможцы будуць узнагароджаны дыпломамі адпаведных ступеняў і каштоўнымі падарункамі.

Урачыстае адкрыццё турыстычнага злёту адбудзецца 25 жніўня ў 10.00. Гэты дзень стане самым насычаным для канкурсантаў, бо на яго прыйдзецца асноўная частка выпрабаванняў. Завершыць яго культурна-забаўляльная праграма.