Больш за 4 тыс. дзяцей нарадзілася ў Магілёве ў мінулым годзе. З іх 2117 хлопчыкаў і 1957 дзяўчынак, паведаміла намеснік начальніка аддзела ЗАГС гарвыканкама Вікторыя Шчапяцільнікава.

У 2017-м першанцы нарадзіліся ў 1802 сем’ях. У другі раз сталі бацькамі 1694 сям’і, трэці – 443, чацвёрты – 77, пяты – 30, шосты – 11, восьмы – 2, дзявяты, дзясяты і дванаццаты – па 1. Прычым на свет з’явілася 38 двайнятак і трое трайнятак. З пачатку 2018-га ў абласным цэнтры нарадзілася 1421 дзіця, а адразу два немаўляты парадавалі 21 пару.

У рэйтынгу імёнаў сярод дзяўчынак лідзіравалі Сафія, Паліна, Дар’я, Марыя і Ксенія. Радзей за ўсё малых называлі Адэля, Амелія, Васіліна, Анжаліка, Анэта, Дзінара, Соня, Міхаліна, Міла, Луна, Лея, Лера, Зоя, Забава, Ефрасіння і інш. Топ-5 мужчынскіх імёнаў выглядае наступным чынам: Арцём, Мацвей, Іван, Цімафей, Максім. У спіс незвычайных патрапілі Альберт, Валянцін, Лявон, Кім, Лук’ян, Мурат, Оскар, Астап, Рафаэль, Тыгран, Эдуард, Георг I, Эльдар, Януш, Фелікс, Веніямін, Гаўрыіл, Карым, Дарафей, Данат і інш. Аналагічныя тэндэнцыі захоўваюцца і ў гэтым годзе.